Орчны бохирдлыг бууруулах Үндэсний хороо “Агаар, орчны бохирдлыг бууруулах Үндэсний хөтөлбөр”-ийн хэрэгжилтийг хангах зорилтын хүрээнд 5 дахь жилдээ ногоон зээлийн хүүгийн татаасын санхүүжилтийг банкнуудад байршуулан, иргэд, аж ахуйн нэгжид хүргэхээр ажиллаж байна.
2023 онд нэг тэрбум төгрөгийн хүүгийн татаасыг банкуудад байршуулсан бөгөөд эко зээл авч хүрээлэн буй орчиндоо хувь нэмрээ оруулах иргэдийн ухамсар нэмэгдсэн, н эрс тэс уур амьсгалын нөхцөлд дулаан өвөлжих хэрэгцээ шаардлага иргэдийн дунд өндөр байгаа учир ногоон зээлийн эрэлт өндөр байгаа тухай банкууд мэдээлж байна.
Орчны бохирдлыг бууруулах Үндэсний хороотой хамтран ажилладаг Хас банкны “Ногоон зээлийн өдөрлөг”-т ирсэн иргэдэд цалингийн орлогыг нь үндэслэн цахилгаан халаагуур, дулаалга, эко жорлон, амины орон сууцны ногоон зээлийг газар дээр нь олгож байна.
Харин бизнесийн орлоготой иргэдийн хувьд зээлийн шалгуурыг хангах материалаа бүрдүүлэн, банкны салбарт хандах боломжтой юм. Хас банкны “Ногоон зээлийн өдөрлөг” өнөөдөр, маргааш Тусгаар тогтнолын талбайд зохион байгуулагдана.
