Өнгөрсөн даваа гаригийн бүлгийн хурлаараа АН-ын дэмжихгүй гэсэн шийдвэрт хүрсэн Үндсэн хуулийн цэцийн тухай, Үндсэн хуулийн цэцэд маргаан хянан шийдвэрлэх ажиллагааны тухай хуулийн шинэчилсэн найруулгын төслийг ХЗБХ-ны гишүүд дэмжээд УИХ-д оруулахаар болов.
АН-ын гишүүдийн хувьд энэ удаагийн хаврын чуулганаар уг хуулиудыг хэлэлцэх шаардлагагүй гэж үзэж байгаа бол МАН-ын бүлэг хэлэлцэх хэрэгтэй гэсээр оруулж ирж байгаа энэ хуулиуд анхаарал татаж байна.
Засгийн Газрын санал дүгнэлт дээр хүртэл ихээхэн асуудалтай, ойлгомжгүй зүйл заалт их, бусад хуулиудтайгаа зөрчилдсөн хуулийн төсөл гэгдээд байгаа хэрнээ хүчээр дэмжлэгтэй явж байгаа хуулийн цаад талд ямар асуудлууд байгаа нь тодорхойгүй байна. Цэцийн гишүүнд тавих болзол шаардлагыг тодорхой болгосон, хараат бус тогтвортой байдлыг нь нэмэгдүүлэх зорилготой гишүүнийг зөвхөн нэг удаа томилж болно гэсэн заалтууд байгаа гэж хууль санаачлагчид ярьж байгаа ч сөрөг хүчнийхэн дархлагдсан бүлэг хүмүүсийг бий болгох гээд байна гэж үзэж байгаагаа мэдэгдэж байгаа билээ. Мэдээж энэ хуулиудад сайжруулах зүйлс их байгаа ч яаран батлуулах гэж байгаагийн цаана юу байна гэж хардах зүйлс байгаа юм. Тухайлбал, цэцэд гаргаж байгаа өргөдөл гомдлыг ерөнхий бүртгэгч гэсэн албан тушаалтан эхний байдлаар үзэж, гомдлоор бүртгэж авах эсэхээ шийднэ гэсэн нь анхаарал татаж байна. Тэр хүн хүлээж авах эсэхийг шийдсэн дараа цэцийн Бага суудлын хуралдаанаар орно гээд бод доо. Тэрхүү албан тушаалтан нь эрх зүйч мэргэжилтэй, долоогоос доошгүй жил эрх зүйчээр ажилласан байхад л болох аж. Үндсэн хууль зөрчсөн эсэх асуудлыг шийдэхэд улс төр, эрх зүйн өндөр мэдлэг, туршлага шаардах учиртай. Гэтэл эрх зүйчээр долоон жил ажилласан байхад хангалттай гэж үзэж байгаа нь харамсалтай. Ер нь энэ хуулийн төсөлд цэцийн гишүүнийг эрхзүйч байхад хангалттай гэсэн заалт орсон нь мэргэжлийн хүмүүсийн хувьд хачирхал төрүүлэх нь ойлгомжтой. Аль болох улс төрөөс ангид байлгана гэсэн тайлбартай ч хариуцлагатай албан тушаалын босгыг хэт намсгаж байгаа нь эзэн нь тодорхой тендэрийн шалгаруулалт шиг байгаад байгаа юм.
