Өнөөдөр Ерөний сайд Л.Оюун-Эрдэнийн тэргүүлж буй хамтарсан Засгийн газарт итгэл үзүүлэх эсэх асуудлыг Төрийн байнгын хорооны хуралдаан, УИХ-ын чуулганаар хэлэлцэх товтой байгаа билээ.

Гадны хэвлэлүүдэд өнөөгийн улс төрийн нөхцөл байдлаас үүдэх эдийн засгийн агуулгын талаар,

Монголын Эдийн Засгийн Хөгжлийн Зөвлөлийн гаргасан дүгнэлтээр, хэрвээ одоогийн Засгийн газар унавал гадаадын шууд хөрөнгө оруулалт эрс буурч, инфляц хурдацтай өсөх эрсдэлтэй нөхцөл байдал үүсэж магадгүй талаар дурджээ.

Монгол дахь улс төрийн тогтворгүй байдал нь сүүлийн жилүүдэд бүрдүүлж чадсан эдийн засгийн ахиц дэвшлийг үгүй хийх эрсдэлтэй. Монгол Улсын парламент өнөөдөр хамтарсан Засгийн газрыг үргэлжлүүлэх эсэх талаар санал хураалт хийхээр бэлдэж буй энэ үед одоогийн улс төрийн нөхцлийг өөрчилбөл эдийн засгийн хувьд томоохон эрсдэл хүлээх талаар APNews мэдээлжээ.

Эдийн засгийн тооцооллоор бол Засгийн газар унаснаар Монголын эдийн засаг зургаан сарын дотор 20 хувиар агшиж, гадаадын шууд хөрөнгө оруулалт жилийн дүнгээр 40 орчим хувиар буурах нөхцөл үүсэх боломжтой.

Монгол Усын Ерөнхий сайд Л.Оюун-Эрдэнэ өнгөрсөн лхагва гарагт УИХ-ын гишүүдэд хандан, өнгөрсөн оны зургадугаар сарын сонгуулийн үр дүнд бүрэлдсэн хамтарсан Засгийн газар цаашид үргэлжлэх эсэхийг шийдвэрлэж өгөхийг хүссэн. Энэ нь сүүлийн үеийн улс төрийн тогтворгүй байдлыг нэг тийш болгох нэг алхам гэж үзэж байна. Монгол Улсын Ерөнхий сайд өнөөдөр УИХ-д хандан үг хэлэх бөгөөд үүний дараа итгэл хүлээлгэх санал хураалт явагдах юм. Энэ үйл явдал нь Монгол Улс ардчилсан тогтолцоонд шилжсэн 1990-ээд оноос хойших хамгийн чухал улс төрийн мөчүүдийн нэг болох төлөв бий.

Санал хураалт ойртож буй энэ үед Монголын Эдийн Засгийн Хөгжлийн Зөвлөлөөс гаргасан шинэ өгөгдөл, тооцоололд дараах үр дагавруудыг дурджээ,

• 6 сарын дотор Үндэсний нийт орлого 22 хувиар буурах
• Нэг жилийн дотор инфляци 12.2 хувиар нэмэгдэх
• Жилийн ажилгүйдлийн түвшин 2.5 хувьд хүрэх
• Монгол төгрөгийн ам.доллартай харьцах ханш 2025 оны эцэс гэхэд 17.9 хувиар суларна
• Монгол Улсын улс төрийн тогтвортой байдлын индекс жилийн дүнгээр 18 нэгжээр буурна

Эдгээр таамаглалууд нь бусад улс орнуудын улс төрийн тогтворгүй байдлаас үүдэлтэй эдийн засгийн сөрөг үр дагавруудтай дүйцэхүйц нөхцөл хэмээн үзжээ. Жишээ нь:

Дэлхийн Банк болон бусад эх сурвалжуудын мэдээллээр, Эстонид эвслийн засгийн газар унасны дараа гадаадын шууд хөрөнгө оруулалт 2021 онд 7.54 хувь байснаа 2024 онд 0.74 хувь болж буурсан. Эдийн засгийн өсөлт нь 2021 онд 7.3 хувь байсан бол 2024 онд -0.9 хувь болж унасан.

1960–2004 оны хооронд 169 улс орныг хамруулсан олон улсын судалгаагаар улс төрийн өндөр тогтворгүй байдал нь нэг хүнд ногдох ДНБ-ий өсөлтийг бууруулдаг байна.

Эдийн Засгийн Хөгжлийн Зөвлөлийн гишүүн, Монгол Улсын Их Сургуулийн Бизнесийн Сургуулийн профессор доктор Б.Батнасан хэлэхдээ:

“Хамгийн сүүлийн үеийн тоон үзүүлэлт нь Монголын хамтарсан Засгийн газар унавал гарах эдийн засгийн хор уршгийг харуулж байна. Эдийн засгийн огцом уналт, хяналтаас гарах инфляц, ажилгүйдэл нэмэгдэх хандлага зонхилж болзошгүй. Улсын удирдлагыг хэн барихыг шийдэх нь сонгогдсон төлөөлөгчдийн бүрэн эрх. Гэвч ийм шийдвэрийг бодит баримтад тулгуурлан, боломжит эрсдлүүдийг бүрэн ойлгосны үндсэн дээр гаргах нь чухал. Эдийн Засгийн Хөгжлийн Зөвлөлийн хийсэн дүн шинжилгээ болон дэлхийн бусад улс орны туршлагаас харахад энэ нь анхаарал татахуйц сэрэмжлүүлэг болж байна. Монгол Улс сүүлийн жилүүдэд хичээл зүтгэлээр олж авсан эдийн засгийн ахиц дэвшлээ алдах өндөр эрсдэлтэй” гэжээ.

Энэхүү шинэ дүн шинжилгээ болон олон улсын жишээг давтах үгүйг өнөөдөр Монголын парламент шийднэ. Чухал шийдвэр гаргах гэж байгааг тод харуулж байна. COVID-19 цар тахлын дараа Монгол Улсын эдийн засаг 9 тэрбум ам.доллараар нэмэгдэж, нэг хүнд ногдох ДНБ 2,400 ам.доллараар өссөн зэрэг ололтууд бүгд эрсдэлд орох магадлалтай байна.

Т.ГЭРЭЛТ-ИРЭЭДҮЙ

Эх сурвалж: Yahoo Finance, Business Today

Эх сурвалж: Eguur.mn