УИХ-ын сонгууль болоод нэг жил өнгөрлөө. Товчхондоо УИХ-ын сонгуулийн бүрэн эрхийн хугацаа 4 жил буюу 1460 хоног байдгаас 1 жил буюу 365 хоног өнгөрч, ирэх 3 жил буюу 1090 өдөр үлдлээ.
Үүнийг хэлэхийн учир нь улс төрийн намууд иргэд сонгогчдын саналыг авахын тулд “Мөрийн хөтөлбөр” дэвшүүлж, тухайн мөрийн хөтөлбөр нь иргэдийн аж амьдрал, ахуй орчинг сайжруулахад чиглэгдсэн байдаг бөгөөд түүнд нь сонгогчид итгэж намд, улс төрчдөд саналаа өгдөг.
Өөрөөр хэлбэл намууд “мөрийн хөтөлбөрийг иргэдэд санал болгож, тэдний итгэлийг авч парламентад суудал авч, Засгаа байгуулж ажилладаг” гэсэн үг.
Ардчилалын энэ үндсэн зарчмын дагуу 2024-2028 оны сонгуулийн жилд МАН парламентын 126 суудлаас дангаараа 68 суудал буюу олонхийг бүрдүүлж Засгийн газраа байгуулах эрхтэй болсон.
Гэвч МАН парламентад суудалтай бусад намуудтай хамтран Засгийн газраа байгуулан ажиллаж байна. Дангаараа засгаа байгуулах эрхтэй ч бусад намтай хамтрах эсэх нь цэвэр МАН-ын дотоод асуудал.
Ингэлээ гээд тэд (МАН) дэвшүүлсэн мөрийн хөтөлбөрөөсөө бултах, зайлах, хэрэгжүүлэхгүй байх үндэслэл үгүй.
УИХ-ын сонгууль болсноос хойш нэг жил өнгөрч байгаа ч хэн ч энэ асуудлыг дурьдсангүй. Мэдээжийн хэрэг эрх барьж байгаа МАН, улс төрчид сонгуулийн нэг жилийн ойг санах, иргэдэд сануулах хүсэл сонирхол огт үгүй нь ойлгомжтой.
Учир нь тэд өнгөрсөн нэг жилийн хугацаанд иргэд сонгогчид, ард олны хүсэл талархалд нийцэхүйц, мөрийн хөтөлбөрийнхээ биелэлтийг хэрэгжүүлээд эхлэхүйц “нүдэнд харагдаж, гарт баригдахуйц” нэг ч ажил хийгээгүй, хийж чадаагүй тул аль болох чимээгүй байхыг чухалд үзэх биз.
Гэвч улс төрчдөөс сонгуулийн “амлалтыг нь нэхэж, амыг нь асуух” уриатай amlalt.mn сайт эрх баригч МАН-аас сонгуулийн мөрийн хөтөлбөр, амлалтыг нь асууна, бас нэхнэ.
Энэ удаад бид 2020 оны УИХ-ын сонгуулиар МАН “Хүчээ нэгтгэе” уриатай оролцон парламентад үнэмлэхүй олонхи болж Засгийн газраа байгуулан 4 жил ажилласан. Тэгвэл 2020 онд МАН мөрийн хөтөлбөртөө оруулсан олон заалтаас ганцхан заалтыг онцлон авч үзье.
2020 оны УИХ-ын сонгуульд “Хүчээ нэгтгэе” уриатайгаар оролцсон МАН-ын Мөрийн хөтөлбөрийн 1.4.20-т “Нүхэн жорлонтой бүх цэцэрлэг, сургууль, дотуур байрыг орчин үеийн ариун цэврийн өрөөтэй болгож, хүүхдэд ээлтэй орчин бүрдүүлнэ” гэсэн мөрийн хөтөлбөр дэвшүүлсэн.
Гэтэл 2024 оны УИХ-ын сонгуульд “Ард түмний ялалт” уриатайгаар оролцсон МАН-ын мөрийн хөтөлбөрийн 1.3.15-т “Нүхэн жорлонтой цэцэрлэг, сургууль, дотуур байрыг орчин үеийн ариун цэврийн байгууламжтай болгож, хүүхдэд ээлтэй орчин бүрдүүлнэ” гэж заасан байна.
Товчхондоо МАН 2020-2024 онд амласан ч хэрэгжүүлж чадаагүй ажлаа 2024-2024 онд дахин мөрийн хөтөлбөртөө оруулжээ.
Гэсэн ч 2024 оноос хойш бүтэн нэг жилийн хугацаа өнгөрсөн ч өнөөдөр мөрийн хөтөлбөрийн дээрх заалтын биелэлт логикийн хувьд 25 хувьтай тэнцэх хэмжээнд хэрэгжиж эхэлсэн байх ёстой ч таг чиг хэвээр байна. Тодруулбал МАН дангаараа засаг бариад 9 дэх жилдээ болж байгаа атал мөрийн хөтөлбөртөө тусгасан цэцэрлэг , ЕБС-ын сургуулиуд нүхэн жорлонтой байсаар л байна. Ганцхан жишээг хэлэхэд бодит байдал ийм л байна.
Энэ мэтээр ард иргэдийн саналыг авахын тулд улс төрийн нам, улс төрчид юу ч гэж худал ярьж болдог, амласан амлалтаасаа эсрэг ажилладаг, хэлсэн амласанаа хэрэгжүүлдэггүй мартуулдаг байдлыг иргэд сонгогчид хэрсүү АЖИГЛАЖ, АМЛАЛТЫГ НЬ НЭХЭЖ ЧАДДАГ болсон хойно л улс төрийн хариуцлага сайжирч, тэр хэрээр улс орны хөгжил урагшилна.
Сонгууль өнгөрөөд нэг жил өнгөрөөд байхад мөрийн хөтөлбөр, амлалтаа огт хэрэгжүүлж чадаагүй байгаа МАН, цаашдаа ирэх 3 жилд сонгуулийн мөрийн хөтөлбөрөө гялалзтал биелүүлнэ гэдэгт ард иргэд, сонгогчид итгэж чадахгүй нь ойлгомжтой.
Ц.Мөнх
amlalt.mn
