өсвийн тодотгол ид яригдаж байгаа ойрын өдрүүдэд хэрүүл тэмцэл болж байж, Монгол Улсын 2025 оны төсөвт эмнэлгүүдийн тоног төхөөрөмжийг шинэчлэх зорилгоор тодорхой хөрөнгө тусгуулж, УИХ-аар батлуулсан ч цаг хугацаандаа багтаан зарим ажлыг гүйцэтгээгүйгээс 60 орчим тэрбумыг огт зарцуулалгүй байсаар буцааж татуулсан “гарз”-тай Эрүүл мэндийн яамны Төрийн нарийн бичгийн дарга Д.Очирбатын эс үйлдэл, томоохон шантааж нь олны анхааралд орж магадгүй байна. Эрүүл мэндийн салбар нь өрөнд баригдчихсан, улс нь хувийн хэвшлүүдээ хулхидсаар байгаад Монголын эмийн хангамж тасалдах дээрээ тулсан, эмнэлгүүд цаашлаад улсаараа эмгүй болох эрсдэл нүүрлэчихсэн, эмнэлгийн төлбөртэй үйлчилгээ нь 20-25 хувь нэмэгдэх болчихоод байгаа энэ үед эрүүл мэндийн салбарынханд төсөв илүүднэ гэж төсөөлөхөд ч гайхмаар, бас харамсмаар. Хэргийн эзэн хэнгэрэгийн дохиураар тодорч эхлээд байгаа Эрүүл мэндийн яамны Төрийн нарийн бичгийн дарга Д.Очирбат хэлэхдээ “Т.Мөнхсайхан сайдын хувьд орон нутгаас тоног төхөөрөмжийн судалгаа авсан нь цаг хугацаа алдсан. Хөрөнгө оруулалтын асуудал нь сайдын бүрэн эрхийн асуудал” хэмээн ажлаа өгсөн сайддаа “Ар хударга” үзүүлж байгаа.
Сошиал орчинд сайд төрийн нарийн хоёрын ашиг сонирхол, авлигын зөрчлийн асуудлаас үүдэлтэй маргаанаар 60 тэрбум төгрөгийн төсөв түмэн олны эрүүл энхийн төлөө үйлсэд зарцуулагдалгүйгээр буцаагдсан гэх боловч, учир мэдэх эх сурвалжууд төрийн нарийн бичгийн дарга Д.Очирбат сайдынхаа өгсөн чиглэлээс зөрж шантааж хийсээр байгаад төсвөө буцаалгасан гэдгийг хэлж байна. ЭМЯ-ны сайд асан Т.Мөнхсайхан нь Эмнэлгүүдэд дутагдалтай байгаа тоног төхөөрөмжүүдийг олон орноос нээлттэй ил тод авах чиглэл өгсөн гэх боловч, мань төрийн нарийн бичгийн дарга Бээжинг зорьж ирээд зөвхөн Хятадын тоног төхөөрөмжүүдийг л нийлүүлнэ гэж улайран зүтгэж удаашруулсаар байгаад төсвөө эргүүлэн татуулсан гэдгийг дурдаж буй эх сурвалж бас байна. Өөрөөр хэлвэл Д.Очирбатын ойлголцсон зөвхөн нэг улсын нэг хоёр компанитай цавчаа хийх тохироогоор яваагүй учраас ийнхүү Эрүүл мэндийн салбарт төсвийн гарз гарч, түмэн олны эрүүл мэндийн асуудал хохирох дээрээ тулж иржээ гэсэн хардлага төрж байгаа юм.
Энэ талаар эх сурвалжууд Х буюу твиттерт жиргэж, хэвлэл мэдээллээр ч гарч эхэлж байна. УИХ-ын гишүүнээр удаа дараа сонгогдож, дүүргийн засаг дарга, ЭМЯ-ны төрийн нарийн бичгийн дарга гээд түмэн олны итгэлийг авч төсвийн мөнгөн дээр олон жил тарвалзсан тэрбээр ядаж эрүүл мэндийн салбарын онцлогийг бодож, 3 хан сая Монголчуудынхаа эрүүл энхийг бодоод оновчтой, ил тод, нээлттэй менежмент хийчихгүй яавдаа гэж бодохоор харамсах, халаглах ч багадмаар. Төсөв рүү буцаан татагдаад буй 60 тэрбумаар Ховд, Орхон аймгийн нэгдсэн эмнэлэгт MRI, Амгалан амаржих газар болон Эх хүүхдийн эрүүл мэндийн үндэсний төвд компьютер томографи аппарат хоёрыг суурилуулах, хавдрын эрт илрүүлгийн тогтолцоог сайжруулах зорилгоор арван аймагт хөхний зураг авч, хавдар илрүүлэх аппарат, хэвлийн хөндийн мэс заслын тоног төхөөрөмж 10 –ыг авахаар төлөвлөж байсан тухай ч салбарынхан хэлж байна. Одоо ингэхэд хэн Монголчуудын эмийн хангамжийг хариуцаж, эмнэлгүүдийн төлбөрийн зөрүүг зохицуулж өгөх билээ Д.Очирбат даргаа.
