Монголчууд бидний сошиал (фэйсбүүк, инстаграм, твиттер) хэрэглээ өндөр байдгийг дагалдан элдэв сүлжээний бизнес, хуурамч бүтээгдэхүүнийг олон нийтэд ҮНЭН гэж итгүүлэхийн зэрэгцээ улс төр, хууль шүүх, захиргааны үйл хэрэг ч сошиал орчинд хөтлөгдөн явагддаг болсон нь нууц биш.
Интернэтэд бүх юмыг мэддэг “имфлүүсэр”-үүд нар олон болж, өөрсдийгөө хамгийн мундаг, хамгийн шилдэг, хамгийн сайн нь гэж бусдаар яриулаад, дараа нь элдэв бүтээгдэхүүн сурталчилдаг байдал газар авч, энэ нь эргээд иргэдийг олноор нь хохироодог явдал улам өргөжсөөр байна.
Имфлүүсэр нэртэй олны танил хүмүүсийн “ХАМГИЙН САЙН” хэмээн сурталчилсан орон сууц, барилгын материал, хүнсний болон бусад бараа бүтээгдэхүүн, элдэв зүйлд итгэж, хөрөнгө мөнгө, эрүүл мэнд, амь насаараа хохирох явдал гарч байгааг ч интернэт орчинд дурьдах боллоо.
Хуурамч бараа бүтээгдэхүүн, хууль бус наймаа, иргэдийн эрүүл мэндэд хор учруулахуйц чанаргүй хүнсний бүтээгдэхүүүн зэрэгт хяналт тавьдаг Мэргэжлийн хяналтын газрыг эрх баригчид татан буулгаж, түүний чиг үүргийг харьяа яамд руу шилжүүлээд 3 жил болж байгаа ч яамдаас хэрэгжүүлэх ёстой хяналтын чиг үүрэг бүрэн хэрэгжиж чадахгүй байгаагаас болж иргэд хэрэглэгчид маш ихээр хохирох боллоо. Үүний тод илрэл болсон нэгэн жишээг сошиал дах баримт мэдээлэлд тулгуурлан товч хүргэе.
Бараг 10-аад жилийн өмнөөс телевизийн нэвтрүүлгүүдээр “Ай Ёо” ток шоу гэх эрүүл мэндийн нэвтрүүлгийг хөтөлж олны танил болсон Б.Дугархүү гэх эмч залуу хожим нэг нэвтрүүлгээрээ эмэгтэйчүүдийн эмчийн ямарч мэдлэггүй атлаа, буруу худал ярьж эмэгтэйчүүдийг ихэд “доромжилж” олны дургүйцлийг төрүүлсэн ч тэрбээр сошиал орчинд “эргэлдсээр” олон дагагчтай болж, эрүүл мэндийн зөвлөгөө өгөх нэрээр элдэв бүтээгдэхүүн сурталчлан борлуулах болжээ. Б.Дугархүү эмч өөрийн 480 гаруй мянган дагагчтай пэйж хуудсаараа дамжуулан Нидерланд улсад үйлдвэрлэсэн эрүүл мэндийн нэмэлт бүтээгдэхүүн болох НМН гэх хүнсний нэмэлт бүтээгдэхүүнийг өөрөө сурталчилж 60 ширхэг кабсултай 1 хайрцагийг нь 259.700 төгрөгөөр худалдаалж байна.
Энэ тухай https://www.facebook.com/erchuudiin.delguuriin.akhlah/ хуудасны эрхлэгч Munkhbat Sukh-Ochir баримт түшин мэдээлсэн байна. Б.Дугархүү эмч НМН гэх хүнсний нэмэлт бүтээгдэхүүнийг сурталчлахдаа “эхлээд цагаан үсийг хар болгодог” гэсэн бол дараа нь “арьс арчилгааны бүтээгдэхүүн” гэсэн бол удаад нь “эмэгтэйчүүдий өвчнийг эдгээж, хүүхэдтэй болж чадахгүй байгаа эмэгтэйчүүдийг хүүхэдтэй болгоно” гэсэн бол дараа нь “чихрийн шижин өвчнийг эдгээж байна” гэснээ бүр сүүлд нь “ахмадууд НМН хэрэглэснээр залуужуулж, хөгшрөхгүй, зөнөгрөхгүй байх боломжтой” гэснээ төд удалгүй “бэлгийн сулралыг эмчилдэг бүтээгдэхүүн” гэж сурталчилсан байна.
Түүний энэ сурталчилгаанд итгэсэн ахмадууд тэтгэврийн мөнгөөрөө НМН бүтээгдэхүүнийг авах болсон байна. Тэр мөн өөрөө НМН уугаад 3 хоног уугаад үр дүн гарсан гэснээ иргэдээс тус бүтээгдэхүүнийг уугаад үр дүн гарсангүй гэхэд “олон хоног уух хэрэгтэй” гэж ярих жишээний.
Б.Дугархүү эмч дээрх НМН-ийг Нидерланд улсаас оруулж ирсэн гэх боловч дээрх баримтаар бол Хятад улсаас нэг бүрийг нь 3 ам.доллар буюу 11.000 төгрөгөөр оруулж ирээд, “бүх өвчинд сайн, эмчилдэг” хэмээн сурталчилж тус бүрийг нь 250 гаруй мянган төгрөгөөр зарж байна гэв.
Тиймээс цахим орчиноор дамжуулан элдэв эм, эмийн бүтээгдэхүүнийг сурталчилдаг “Ай ёо доктор” гэх Б.Дугархүү эмчийн сурталчилдаг дээрх НМН зэрэг бүтдэхүүнтэй холбоотой асуудлыг ЭЦГ, Эмийн хяналтын газраас нэн даруй шалгаж, эцсийн үнэн мөнийг нь тогтоотол НМН бүтээгдэхүүнийг нь худалдан борлуулахыг нь хориглох хэрэгтэй.
Хэрэв Б.Дугархүү эмч үнэхээр Нидерланд улсад үйлдвэрлэдэг НМН -ийн эх бүтээгдэхүүнийг нь дуурайлган Хятад улсад үйлдвэрлэсэн нь үнэн бол түүний эмчийн эрхийг нь цуцалж, Эрүүгийн хариуцлага хүлээлгэх учиртай.
Иргэд, хэрэглэгчид та бүхэн ч гэсэн сошиалаар сайн гэж сурталчилж буй элдэв эм, хүнсний нэмэлт бүтээгдэхүүн, витамин, гоо сайханы бүтээгдэхүүнд итгэж, эрүүл мэнд, эд хөрөнгөөрөө хохирохоос урьдчилан сэргийлж, сэрэмжтэй байх нь чухал юм.
Ц.Мөнх
Amlalt.mn
