Хот байгуулалт, барилга, орон сууцжуулалтын сайд Э.Бат-Амгалан энэ сарын 12-ны өдөр 2025-2026 оны хөрөнгө оруулалтын ажлын явцтай танилцлаа. Цахим хуралд аймгуудын Засаг дарга нар болон бусад 87 байгууллагын 111 албан тушаалтан оролцлоо.
Хурлын эхэнд ХББОС-ын сайд Э.Бат-Амгалан “ХББОСЯ-нд 131 шинэ хөрөнгө оруулалтын ажлын санал ирснээс 27 хөрөнгө оруулалтын ажил холбогдох хуулиудын шаардлагыг хангаж, Сангийн яамны цахим системд шивэгдэж орсон.
Үлдсэн 104 хөрөнгө оруулалтын ажил нь Төрийн хэмнэлтийн тухай хуульд заасны дагуу хасагдсан учраас аймгийн Засаг дарга нар төсвийн төсөлд санал өгөхдөө холбогдох хуульд нийцүүлж, Төрийн хэмнэлтийн тухай хуулийг баримтлах ёстой" гэдгийг онцлов.
Учир нь дээрх хуулийн 13.4-т “Улсын төсвийн хөрөнгө оруулалтаар хэрэгжүүлэх төсөл арга хэмжээний жагсаалтад тусгахыг хориглосон орон нутгийн нийтийн эзэмшлийн зам талбай, олон нийтийн соёл амралтын хүрээлэн, хаягжуулалт, гэрэлтүүлэг, тохижилт, нийтийн эзэмшлийн байр, орон сууц, оффисын засвар шинэчлэлийн саналыг аймаг, нийслэлээс ирүүлсэн учраас 104 төслийг хассан байна.
Энэ үеэр ХББОСЯ-ны Санхүү хөрөнгө оруулалтын газрын дарга Б.Уянга орон нутгийн байгууллагууд төсвийн хөрөнгө оруулалтын ажилд онцгойлон анхаарах шаардлагатай хэд, хэдэн чухал асуудлыг хөндөв. Тодруулбал,
Засгийн газрын 2023 оны 278 дугаар тогтоолоор төсвийн хөрөнгө оруулалтаар хэрэгжүүлэх төсөл арга хэмжээг төлөвлөх, санхүүжүүлэх, хянах, тайлагнах журмыг баталсан. Үүний дагуу аймаг, орон нутгууд сар бүрийн 5-ны дотор ХББОСЯ-нд ирүүлэх ёстой. Гэтэл өнөөдрийн байдлаар нэг ч аймаг, орон нутаг мэдээгээ ирүүлээгүй байна. Мэдээгээ цаг хугацаанд нь ирүүлэхгүй бол бусад яамтай тооцоо нийлэхэд хүндрэл учирдаг.
Аймгууд эрх шилжсэн хөрөнгө оруулалтын төслийг зориулалтын бусаар зарцуулах тохиолдол гарч байна. Тухайлбал, нэгэн аймагт хөрөнгө оруулалтын шинэчлэл, дэд бүтэц инженерийн шугам сүлжээг хэрэгжүүлэх төслийг батлуулсан боловч үүнийгээ тохижилт, цэцэрлэгт хүрээлэн, авто зогсоол гэж нэрийг нь өөрчилж төслийг зориулалтын бусаар ашигласан тохиолдол гарсан.
ХББОСЯ-ны захиалгатай хэрэгжүүлж байгаа ажлуудыг захиалагчийн зөвшөөрлийг үндэслэлгүй өөрчлөлт оруулдаг асуудал гарч байгаа учраас цаашид анхаарах шаардлагатай.
