Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төслийн анхдугаар хэлэлцүүлгийг өнөөдөр /2025.11.20/ зохион байгууллаа. Хэлэлцүүлгийг Улсын Их Хурлын гишүүн Б.Жаргалан нээж үг хэлсэн бөгөөд тэрбээр байцаан шийтгэх тогтолцооноос хянан шийдвэрлэх тогтолцоо руу шилжсэн боловч бодит байдал дээр бүрэн төлөвшиж, тогтолцооны бүх түвшинд хэрэгжих явц хангалтгүй байна гэлээ. Шүүхийн мэтгэлцээний зарчим бүрэн хэрэгжихгүй, нотлох баримтыг талуудын мэтгэлцээнээр бус мөрдөн шалгах байгууллага, прокурор, заримдаа шүүх өөрөө бүрдүүлдэг хэв маяг үлдсэн, иргэний дуугүй байх эрх, өөрийн болон гэр бүлийнхнийхээ эсрэг мэдүүлэг өгөхгүй байх эрх бодит амьдрал дээр төдийлөн баталгаажаагүй байгаа талаар дурдлаа. Түүнчлэн иргэн- төрийн харилцааг тэнцвэржүүлэх, гэм буруутай нь нотлогдохоос өмнө хэн ч яллагдахгүй байх баталгааг сайжруулах, шүүхийг хараат бус, итгэл даах институц болгох нь бид бүгдийн нийтлэг зорилго юм гэв.
Хэлэлцүүлэгт хуульч, өмгөөлөгч, судлаач, эрдэмтэн, мэргэжлийн холбоодын удирдлагууд оролцсон бөгөөд “Эрүүгийн процeсст оролцож буй өмгөөлөгчийн эрх зүйн байдал”-ын талаар хуульч Д.Оросоо танилцуулахдаа эрүүгийн хэрэг хянан шийдвэрлэх ажиллагаанд оролцож буй иргэний эрхийг хамгаалах асуудал дээр туслалцаа үзүүлж байгаа өмгөөлөгчийн мэргэжлийн эрхийг, хүний эрхийг хамгаалагч, мэргэжлийн оролцогчийн түвшинд олон улсын жишигт ойртуулах, хүний эрхийг хамгаалах олон улсын механизмтай холбох зайлшгүй шаардлагатай гэлээ.
Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төслийн талаар хуульч Н.Ариунболд танилцуулж, энэхүү хуулийн төсөлд хүний эрхийн баталгааг бодит болгох, талуудын тэгш мэтгэлцээний зарчмыг хангах, прокурорын хараат бус, мэргэжлийн бие даасан байдлыг бэхжүүлэх, шүүхэд итгэх олон нийтийн итгэлийг сэргээх, хэн ч хэлмэгдэх эрсдэлд өртөхгүй байх хамгаалалтыг бүрдүүлэхийг зорьжээ.
Танилцуулгын дараа оролцогчид тус тусын байр сууриа илэрхийлэн санал, солилцож практикт тулгамдаж буй асуудлын хүрээнд зөвлөлдлөө гэж Улсын Их Хурлын Хэвлэл мэдээллийн газраас мэдээллэв
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!