Баянзүрх дүүргийн Монгол Ардын намын хорооны дарга, УИХ-ын гишүүн, Хот байгуулалт, барилга, орон сууцжуулалтын сайд Э.Бат-Амгалан Тусгаар тогтнолын ордонд өнөөдөр /2025.12.16/ болсон ахмадуудын уулзалтад оролцов.

Намын дэргэдэх Социал Демократ Ахмадын Холбооноос 14 хоног тутамд зохион байгуулж буй уулзалтын 20 дахь нь олон иргэний сонирхдог байр, орон сууц, түрээс, ипотекийн талаар өрнөсөн юм. Энэхүү уулзалтад СДАХ-ны нийслэлийн дүүргүүдийн 800 гаруй гишүүн, дэмжигч оролцсон тул Хот байгуулалт, барилга, орон сууцжуулалтын сайд Э.Бат-Амгалан төрийн бодлогоор Улаанбаатарт хэрэгжиж буй орон сууцны төслүүдийг танилцууллаа.

Тодруулбал, Баянхошуу, Шар хад, Сэлбэ, Баянголын ам, Ханын материал, Ногоон нуур, Солонго 1 ба 2 хороолол, “Залуус-1” зэрэг нийт 10 байршилд төсөл хэрэгжүүлж эхэлсэн бөгөөд 2028 он гэхэд 27.310 айлыг орон сууцад оруулахаар төлөвлөжээ. Төслүүд одоогоор төлөвлөгөөний дагуу явж байгаа, энэ 2025 онд 1228 айл орон сууцдаа орж байгаа юм. Иргэд эдгээр орон сууцад түрээслэх, түрээслээд өмчлөх, газраараа солих зэрэг хэлбэрээр хамрагдаж байгаа аж.

Олон хүн орон сууцад орох хүсэлтэй байдаг ч нэг метр.кв-ын үнэ нэмэгдсээр байгаа шалтгааныг сайд Э.Бат-Амгалан тайлбарлахдаа “Цаашид орон сууцны нэг метр.кв-ын үнэ өссөөр байх тул төрөөс Орон сууцжуулалтын тухай анхдагч хууль гаргахаар Засгийн газар, УИХ-ын төвшинд ажлын хэсгүүд ажиллаж байна. Төр орон сууцжуулах бодлогоо барьж, газрыг нь гаргаж өгнө, дэд бүтцийг татаж өгнө, банкнаасаа эх үүсвэр авна, барилгын дундаж компаниудыг сонгон шалгаруулж тендерт оролцуулна. Манай барилгын компаниудын хүчин чадал сайжирсан. Гол нь чанартай барилга барьж төрд нийлүүлэх ёстой, тэндээсээ төр дараагийн төслүүдээ босгох зарчмаар ажиллах юм. Энэ бол Солонгос, Сингапур, Казахстан улсад явуулдаг 80-90 хувийн төрийн оролцоотой ажиллаж болдог тогтолцоо юм” гэлээ.

Энд дурдсан Орон сууцжуулалтын тухай анхдагч хууль, мөн Орон сууцны санхүүжилтийн банкны тухай гэсэн хоёр хуулийн төслийг УИХ-аар хэлэлцүүлж батлуулахаар ажлын хэсгүүд ажиллаж байгаа аж. Улсын хэмжээнд өнөөдрийн байдлаар нийт 130 мянган өрхөд 11 их наяд төгрөгийн ипотекийн зээл олгосон байна. Дээрх хоёр хуулийн төсөл эцэслэн батлагдвал орон сууцны үнэ буурна гэж тооцож байгаагаа Хот байгуулалт, барилга, орон сууцжуулалтын сайд Э.Бат-Амгалан онцлов.

Үүнээс гадна хот, хөдөөгүй хүний таатай амьдрах орчныг цогц байлгахын тулд барилгын салбарт цэвэрлэх байгууламж, бохирын шугам, инженерчлэлийн шугам сүлжээ, барилгын материал, цемент, арматурын үйлдвэр, импортын материалын чанар, стандартыг хянах лаборатори чухал гэдгийг сайд хэлж байв.

Мөн төр, төсвийн хөрөнгийн оролцоогүйгээр олон улсын түнш байгууллагуудын тусламжтайгаар нийслэлийн хуучны угсармал 1048 орон сууцны 375-ынх нь гадна дулаалгыг шийдсэн гэх зэрэг салбарынхаа ахицтай яваа ажлуудаасаа ахмадуудад танилцуулсан юм.

Ахмадуудын хувьд газар чөлөөлөх явц удаашралтай, байрандаа ороход зураг төслөөсөө зөрсөн байдаг, байрны чанар муугаас иргэдийн эрх ашгийг хамгаалах хууль, өмгөөлөл хэрэгтэй болдог зэрэг асуудлыг хөндөж байлаа.

Уулзалтад Монгол Ардын намын Нарийн бичгийн дарга С.Мөнгөнчимэг, Хот байгуулалт, барилга, орон сууцжуулалтын яамны Төрийн нарийн бичгийн дарга М.Баяраа, сайдын зөвлөх И.Баттөгс, Социал Демократ Ахмадын Холбооны тэргүүн Б.Гомбо, тус холбооны ерөнхий нарийн бичгийн дарга Т.Гантөмөр нар оролцлоо.

Эх сурвалж: mcud.gov.mn