2025 онд Улаанбаатар хотод цахилгаан, дулааны станцын томоохон төслүүд амжилттай хэрэгжлээ. Үүний нэг нь Бөөрөлжүүтийн цахилгаан станцын хоёрдугаар блокийн бүтээн байгуулалт. Улаанбаатар хот анх удаа дотоодын хөрөнгийн зах зээлд 500 тэрбум төгрөгийн бонд арилжаалж, үүний 300 тэрбум төгрөгийг Бөөрөлжүүтийн цахилгаан станцад хөрөнгө оруулсан. Улмаар тус станцын 150 МВт хүчин чадалтай эхний блокийг 2024 оны 12 дугаар сард ашиглалтад оруулж, төвийн нэгдсэн системд эрчим хүч нийлүүлж эхэлсэн билээ.

Тэгвэл тус станцын 150 МВт хүчин чадалтай II блокийн барилга угсралт, туршилт тохируулгын ажил бүрэн дуусаж, төлөвлөсөн хугацаанаасаа сар гаруйн өмнө буюу 2025 оны 10 дугаар сарын 18-ны өдөр төвийн бүсийн эрчим хүчний системд холбогдон цахилгаан эрчим хүчээ нийлүүлж эхэлсэн. Ингэснээр Бөөрөлжүүтийн цахилгаан станц Монгол Улсын эрчим хүчний системд 300 МВт цахилгаан эрчим хүч нийлүүлж байна. Бөөрөлжүүтийн цахилгаан станц 300 МВт хүчин чадлаар ажиллаж эхэлснээр Монгол Улсын 963 мянган өрхийн цахилгаан эрчим хүчний хэрэглээг үйлдвэрлэж байгаа юм. Станц жилд 2.4 тэрбум КВт хүртэл цахилгаан үйлдвэрлэж байна.

Түүнчлэн энэ онд урагшилсан нэг томоохон төсөл бол Дамбадаржаа дулааны станцын төсөл юм. Нийслэлийн Засаг даргын Тамгын газар болон Азийн хөгжлийн банкны санхүүжилтээр 63 МВт хүчин чадалтай Дамбадаржаа дулааны станцын барилга угсралтын ажлыг 2024 оны дөрөвдүгээр сард эхлүүлсэн. Тус станцыг 2026 оны наймдугаар сард ашиглалтад оруулахаар төлөвлөн ажиллаж байна. Нийт ажлын гүйцэтгэл 40 гаруй хувьтай байна. Үйлдвэрлэсэн дулааны 60 хувийг Сэлбэ хот, 40 хувийг Дамбадаржаа дэд төв рүү нийлүүлэх юм. Мөн Дэнжийн мянга буюу Ногоон нуур орчимд 93 МВт хийн дулааны станц, Хан Хиллс хотхоны баруун талд 110 МВт хийн дулааны станцыг ирэх жилээс барихаар бэлтгэл ажлыг хийлээ.

Монгол Улсад анх удаа төр, хувийн хэвшлийн түншлэлээр хэрэгжүүлэх Дулааны тавдугаар цахилгаан станцын түншлэгч аж ахуйн нэгжтэй гэрээ байгууллаа. Мөн Хог шатааж, 35 МВт эрчим хүч үйлдвэрлэх төслийн гүйцэтгэгчийг шалгаруулан гэрээг үзэглээд байна. Мөн 2026 онд Эмээлтийн 24 МВт дулааны цахилгаан станцын барилгын ажлыг эхлүүлэх юм.

Эх сурвалж: Ulaanbaatar.mn