Өмнөговь аймгийн хэмжээнд ухаалаг хүлэмжид газар тариалан эрхлэх чиглэлээр дэвшилтэт технологийг нэвтрүүлэхээр төлөвлөн ажиллаж байна.
Тус ажлыг хэрэгжүүлэх хүрээнд Өмнөговь аймгийн ИТХ болон Даланзадгад сумын ЗДТГ, Хүнс, хөдөө аж ахуйн газрын холбогдох ажлын баг БНСУ-ын засгийн газрын харьяа хөдөөгийн хөгжлийг дэмжих газрын Монгол дахь төлөөлөгч У Мён Гюүтэй уулзаж, ухаалаг фермийн төслийг орон нутагт хэрэгжүүлэх боломжийн талаар санал солилцож, хамтын ажиллагааны эхлэлийг тавьжээ.
Хамтын ажиллагааны хүрээнд Даланзадгад суманд ухаалаг хүлэмжийн аж ахуйг хөгжүүлэх, үрийн тариалалтыг хийх, цагаан будаа тариалах, газар тариалан эрхлэгч нарт сургалт зохион байгуулах зэрэг олон талт ажлыг зохион байгуулахаар болжээ.
Ухаалаг хүлэмжийн аж ахуйг хөгжүүлэхэд бодлогоор дэмжин ажиллана.
Мөн төсөл Өмнөговь аймгийн хэмжээнд хэрэгжүүлснээр орон нутгийн хүнсний ногооны хангамжийг нэмэгдүүлэх, тариалан эрхлэгчдийн орлогыг өсгөх, улмаар бүс нутгийн тогтвортой хөгжилд чухал хувь нэмэр оруулна гэж талууд онцлов.
Харин “Копиа Монгол төв”-ийн захирал У Мён Гюү нэмж хэлэхдээ дөрвөн улирлын ухаалаг хүлэмжийг нэвтрүүлснээр чанар сайтай, жигд ургац авах боломж бүрдэх, нэг удаагийн хураалтаар арвин их ургац авах, ургацыг савлах, хадгалах, түгээх үйл явцыг зөв үе шаттайгаар зохион байгуулах, жилийн турш тасралтгүй үйлдвэрлэл явуулах нөхцөл бүрдэнэ гэлээ.
Amlalt.mn
