Хүний эрхийн Үндэсний Комиссын дарга Д.Сүнжид Холбооны Бүгд Найрамдах Герман Улсаас Монгол Улсад суугаа Онц бөгөөд Бүрэн эрхт Элчин сайд Хельмут Рудольф Кулитц, Элчин сайдын яамны Улс төрийн хэлтсийн ажилтан Б.Батзаяа болон холбогдох албан тушаалтнууд өнөөдөр /2026.01.08/ хамтын ажиллагааны талаар санал солилцох уулзалт хийлээ.
Уулзалтын үеэр талууд хүний эрхийн боловсрол, тэр дундаа залуучуудад хүний эрхийн талаарх мэдлэг, ойлголтыг нэмэгдүүлэх, таниулах, сурталчлах чиглэлээр хамтран ажиллах боломжийн талаар ярилцав.
ХЭҮК-ын дарга Д.Сүнжид Монгол Улсад анхаарах шаардлагатай 13 зорилтот бүлэг байдгийн нэг нь 15–35 насныхан бөгөөд тэд 2024 оны байдлаар нийт хүн амын 30.4 хувийг эзэлж, улс орны ирээдүйн хөгжил, нийгэм, эдийн засгийн өсөлт, ардчиллын тогтвортой байдалд чухал нөлөө үзүүлэх гол бүлэг болохыг онцоллоо.
Мөн дэлхийн залуучуудын хөгжлийн индексийн 2023 оны үнэлгээгээр Монгол Улс 0.77 оноо авч, залуучуудын хөгжлийн ерөнхий түвшин дунджаас дээш байгааг дурдлаа. Тухайлбал, залуучуудын эрүүл мэнд, сайн сайхан байдлын үзүүлэлтээр 39-р байр, улс төр, иргэний оролцооны чиглэлээр 183 орноос 24-р байранд эрэмбэлэгдсэн нь энэ чиглэлээр тодорхой ахиц гарсныг харуулж байна.
Гэсэн хэдий ч боловсрол, ажил эрхлэлт, боломжийн тэгш байдал, хүртээмж, чанартай үйлчилгээ авах нөхцөлд хот, хөдөөгийн ялгаа харилцан адилгүй хэвээр байгааг хэллээ. Түүнчлэн, хүний эрхийн эрх зүйн орчин харьцангуй бүрдсэн боловч залуучууд, өсвөр үеийнхний дунд хүний эрхийн талаарх мэдлэг, эрхээ мэдэх, зөрчлийг таних, хамгаалах чадавх хангалтгүй байгааг онцоллоо.
Иймд залуучуудын оролцоо, идэвхийг хүний эрхийн мэдлэгээр бэхжүүлэх, хүний эрхийг өдөр тутмын амьдралд хэрэгжих үнэт зүйл, зан үйл болгон төлөвшүүлэхэд чиглэсэн шинэлэг, интерактив, дижитал шийдлийг хамтран хэрэгжүүлэх шаардлагатай байгааг дурдав.
Германы Холбооны Бүгд Найрамдах Улсаас Монгол Улсад суугаа Онц бөгөөд Бүрэн эрхт Элчин сайд ноён Хельмут Рудольф Кулитц залуусын хүний эрхийн мэдлэг ойлголтыг нэмэгдүүлэх санал, санаачилгыг дэмжиж, цаашид хамтын ажиллагааг өргөжүүлэхэд нээлттэй байгаагаа илэрхийллээ.
Эх сурвалж: https://nhrcm.gov.mn/
