Монгол Төрийн үйл ажиллагаа тасралтгүй үргэлжлэх учиртай. Гэтэл дэлхий дахинд нөхцөл байдал хурцдаж, Ойрхи Дорнод болон олон улсын тавцанд дайн, хурцадмал байдал нэмэгдэж буй энэ цаг үед Монгол Улс дотооддоо тогтвортой, шуурхай ажиллах шаардлага улам бүр нэмэгдэж байна.
Эдийн засгаа хамгаалах, сэргээх, цаг үеийн шаардлагатай хууль, шийдвэрүүдийг алдалгүй гаргах нь нэн чухал байна. Харамсалтай нь УИХ-ын хаврын чуулган эхэлснээс хойш тодорхой хугацаа өнгөрсөн ч ирц бүрдэхгүй гэх шалтгаанаар чуулган хуралдаж чадсангүй. УИХ дахь АН-ын бүлэг “УИХ-ын дарга Н.Учрал намын даргын албан тушаалаасаа татгалзах ёстой” гэсэн шаардлага тавьж, чуулганд оролцохоос татгалзсан нь энэ гацааны гол шалтгаан болоод байна.
Гэвч “УИХ-ын дарга намын дарга байж болохгүй” гэсэн хуулийн заалт байхгүйг холбогдох хүмүүс онцолж байгаа ч уг асуудлыг улс төржүүлж, төрийн ажлыг саатуулж буй нь анхаарал татаж байна. Түүнчлэн өмнө нь АН засаг барьж байх үед ижил нөхцөл байдал байсныг үл ойшоож буй нь энэ маргааны цаана өөр ашиг сонирхол байж болзошгүй гэх хардлагыг төрүүлж байна. Улс орны эрх ашгаас илүү нам, бүлэглэл, хувийн сонирхлыг урьтал болгож буй энэ нөхцөлд сонгогчид бид дуугүй байх ёсгүй. Ард түмнээс мандат авч, төрд төлөөлөх үүрэг хүлээсэн УИХ-ын гишүүд “ажлаа хийх” үүргээсээ бултах эрхгүй.
Нам харгалзахгүйгээр — МАН, АН гэх ялгаагүй — Монгол Улсын эрх ашгийг нэгдүгээрт тавьж, чуулганы хуралдаандаа суухыг бүх гишүүдээс шаардах цаг иржээ. Чуулгандаа суухгүй байх нь зөвхөн ажлаа тасалж буй хэрэг биш, харин өргөсөн тангарагтаа харш үйлдэл юм.
Улс орны нөхцөл байдал хүнд байгаа үед эрх мэдэл, албан тушаалын төлөө улс төр хийж, төрийн ажлыг гацааж буй нь Монгол төрийн эсрэг үйлдэлтэй дүйцнэ. Иймд иргэд, сонгогчид бид өөрсдийн сонгосон УИХ-ын гишүүдэд хандан хариуцлага нэхэж, чуулгандаа оролцохыг цахим орчинд нэгдэн шаардах нь зүйтэй. Иргэний дуу хоолой нэгдэж чадвал төрийг хөдөлгөж чадна.
Ц.Мөнх
amlalt.mn
