Нийслэлийн Засаг дарга бөгөөд Улаанбаатар хотын Захирагч Б.Пүрэвдагва Дэлхийн банк группийн гишүүн байгууллага болох Олон Улсын Санхүүгийн Корпораци (IFC)-ийн Монгол дахь Суурин төлөөлөгч Матьё де Бланк зэрэг төлөөлөгчтэй уулзлаа.
Цөлжилттэй тэмцэх тухай НҮБ-ын конвенцын Талуудын 17 дугаар бага хурлын үеэр Улаанбаатар хот Дэлхийн банк группийн хамтын ажиллагааны хүрээнд хотын хөгжлийн төслүүдэд шаардлагатай техникийн туслалцаа, зөвлөх үйлчилгээг авах, олон улсын сайн туршлага, мэдлэгийг нэвтрүүлэх чиглэлээр харилцаагаа өргөжүүлэхээр санамж бичиг байгуулсан. Уулзалтаар талууд хэрэгжиж буй төслүүдийн үйл явц, цаашид хэрэгжүүлэх боломжтой хөтөлбөрүүдийн талаар хэлэлцлээ.

Нийслэлийн Засаг дарга бөгөөд Улаанбаатар хотын Захирагч Б.Пүрэвдагва “Улаанбаатар хотын хөгжил, дэд бүтцийн шинэчлэл, уур амьсгалын өөрчлөлтөд дасан зохицох чадавхыг нэмэгдүүлэх чиглэлээр урт хугацаанд хамтран ажиллаж, бодит үр дүн бүхий төслүүдийг хэрэгжүүлж ирсэн Дэлхийн банкны хамт олонд талархал илэрхийлье. Улаанбаатар хотын тогтвортой авто зам, тээврийн төсөл нь нийслэлийн зам тээврийн сүлжээний хүртээмжийг сайжруулах, замын хөдөлгөөний ачааллыг бууруулах, замын хөдөлгөөний аюулгүй байдлыг нэмэгдүүлэх, цаашлаад хотын тогтвортой хөгжлийг хангахад чухал хувь нэмэр оруулж байгаа стратегийн ач холбогдолтой төсөл юм. Мөн сүүлийн жилүүдэд давтамж нь нэмэгдэж буй үер усны эрсдэлийг бууруулах, хотын инженерийн шугам сүлжээний найдвартай байдлыг хангах зорилготой шинэ төслийн бэлтгэл ажилд үзүүлж буй дэмжлэгт бид өндөр ач холбогдол өгч байна” гэлээ.
Дэлхийн банк группийн зүгээс цаашид хотын дэд бүтцийн төлөвлөлт, зээлжих эрхийг сайжруулах, санхүүгийн чадавхыг бэхжүүлэх асуудалд хамтран ажиллах сонирхолтой байгаагаа илэрхийлэв.

Эх сурвалж: ulaanbaatar.mn