УИХ хуралдаж чадахгүйд хүрч, төрийн ажил бодитоор гацаанд орлоо. Дэлхий нийтэд, ялангуяа Ойрхи Дорнодод үүссэн дайн, хурцадмал нөхцөл байдлын улмаас эдийн засгийн савлагаа нэмэгдэж, шатахуун, эрчим хүчний үнэ өсөх нь тодорхой болж байна. Ийм үед улс орнууд шуурхай арга хэмжээ авч, хямралыг даван туулахын төлөө уралдаж байхад Монгол Улс дотоод улстөржилтдөө баригдан, төрийн механизм нь саатсан хэвээр байна.
МАН-ын даргаар сонгогдоод удаагүй байгаа Ням-Осорын Учрал намынхаа их хурал дээр авлига, төрийн хүнд сурталтай эвлэрэхгүй гэдгээ ил тод зарласан. Тэрбээр авлигачдын хөрөнгийг хураах, ёс зүйн ноцтой зөрчил гаргасан гишүүдэд хариуцлага тооцох асуудлыг хаврын чуулганаар хэлэлцүүлэхээр зорьж буй. Гэвч энэ асуудал яригдаж эхлэхтэй зэрэгцэн АН болон МАН доторх улс төрийн бүлэглэлүүд нэгдэн, УИХ-ын үйл ажиллагааг гацаасан нь анхаарал татаж байна.
Өнөөгийн нөхцөлд хариуцлагаас зугтах биш, харин үүрч ажиллах цаг иржээ. Төрийн гацааг гаргах бодит шийдэл нь намын дарга гүйцэтгэх засаглалын тэргүүн болж, намын мөрийн хөтөлбөр бодлогоо өөрөө хэрэгжүүлэх явдал юм.
МАН-ын дүрэмд ч “намын дарга Ерөнхий сайд байх” зарчим тусгагдсан. Энэ зарчмыг хэрэгжүүлж, хэлсэн үг, амлалтаа бодит ажил болгох нь улс төрийн хариуцлагын гол шалгуур мөн.
Монголчууд “ямбыг нь эдэлбэл ялыг нь үүрдэг” гэж ярьдаг. Тиймээс Ням-Осорын Учрал Ерөнхий сайдын үүргийг хүлээн авч, авлига, албан тушаалын гэмт хэрэгтэй бодитоор тэмцэж, төрийн ажлыг зангарагтай удирдах шаардлага тулгарч байна.
Хаврын тариалалт эхлэх гэж буй энэ үед шатахууны үнийн өсөлт, инфляцын дарамт иргэдийн амьдралд шууд нөлөөлөх нь тодорхой. Ийм цаг үед төр нэг өдөр ч биш, нэг цаг ч саатах эрхгүй. Шуурхай, шийдэмгий, хариуцлагатай засаглал, удирдах арга барил энэ хямралыг даван туулна.
Иймээс МАН улс төрийн шийдвэрээ хойшлуулах бус, тодорхой болгож гаргах цаг ирсэн. Төрийн гацааг тайлахын тулд УИХ-ын дарга албан тушаалаасаа чөлөөлөгдөн, Ерөнхий сайдаар томилогдон, намаа ч, төрөө ч "учдирдан", хэлсэн ярьснаа ажил хэрэг болгох нь өнөөдрийн хамгийн бодит гарц юм.
УИХ-ын гишүүд ч дэлхий дахинд үүссэн ийм хямралтай цаг үед АН, МАН, манай, танай гэлтгүй нэгдэн нийлж, улс орныхоо эдийн засгийг хямрал багатай даванэ туулын тулд элдэв улстөржилтөө хойш тавьж, гар нийлэн ажиллах шаардлагатай болоод байна.
А.Галт
Amlalt.mn
