Засгийн газрын хуралдааны дараа Эдийн засаг, хөгжлийн сайд Ч.Хүрэлбаатар мэдээлэл хийлээ.
Тэрээр "Энэ оны гуравдугаар сарын 21 буюу өчигдрийн байдлаар инфляцын түвшин 12 хувьтай байна. Инфляц хамгийн өндөр түвшинд хүрсэн цаг хугацаа бол 2022 оны зургаадугаар сар.
Өнгөрсөн оны зургаадугаар сард 16.1 хувьтай байсан. 2022 оны эцсийн байдлаар 13.2 байсан. Эндээс харахад инфляцын түвшин тасралтгүй буурч байна. Энэ оны эхний хагастаа инфляцын түвшин нэг оронтой тоо руу орчих болов уу гэсэн төсөөллийг Эдийн засаг, хөгжлийн яам хийсэн. Учир нь, Монгол Улсын худалдааны гол түншүүд болох БНХАУ, Солонгос, Орос, Турк зэрэг улсуудад инфляцын түвшин буурч байна. БНХАУ-д инфляц нэг, БНСУ-д 4.8 , ОХУ-д 11 хувьтай байна. Худалдааны гол түншүүдэд инфляц буурч байгаа нь манайд ч буурах нөхцөл болно" гэлээ.
