Засгийн газрын гишүүний чөлөөлөгдөх хүсэлтийг УИХ-д танилцуулснаас 14 хоногийн дараа дараагийн сайдын нэрийг УИХ-д танилцуулах хуулийн зохицуулалттай. Тиймээс Хөдөлмөр, нийгмийн хамгааллын шинэ сайдын асуудлыг ирэх долоо хоногт танилцуулна.

MАН-ЫН БҮЛГИЙН ЭРЭГТЭЙ ГИШҮҮД Н.ЭНХБОЛДЫГ ДЭМЖИЖ, САНАЛ БОЛГОЖЭЭ

Ерөнхий сайд Л.Оюун-Эрдэнэ Хөдөлмөр, нийгмийн хамгааллын сайдад УИХ-ын гишүүдээсээ сонгож томилно гэсэн мэдээлэл бий бөгөөд энэ хэрээр амбицлаж буй олон гишүүн байна. Тэр дундаа эмэгтэй гишүүдийн идэвх маш өндөр байгаа бөгөөд бараг л бүгд “гүйлджээ”.

Эдгээрээс УИХ-ын гишүүн Ц.Мөнхцэцэг, П.Анужин нарыг хамгийн байж болох хувилбар хэмээн ярилцаж намын удирдлагууд нь санал нэгдсэн байсан гэдгийг МАН-ын гишүүд ярьж байна. Ц.Мөнхцэцэгийг ЗГХЭГ-ын дарга Д.Амарбаясгалан дэмжиж байжээ. Улмаар тэдний нэрийг бүлэг рүү оруулахад эрэгтэй гишүүд тэр дундаа “70-аад оныхон” эсэргүүцсэн бөгөөд хариуцлагатай салбарыг туршлагагүй, “сул” хүнээр удирдуулах гэлээ хэмээн шүүмжилжээ.

Ингээд МАН-ын бүлгийн гишүүдийн энэ байр, суурийн дараа Ц.Мөнхцэцэг, П.Анужин нар өрсөлдөж буй нэрээр бие, биеэ татаж унагаах завсар эрчүүд дундаасаа Нямаагийн Энхболдыг нэр дэвшүүлэх нь зүйтэй гэж үзэн намын удирдлагууддаа санал болгосон байна.

Ингэхдээ тэд “Туршлагатай, тулхтай хүнийг томилох нь зөв” тайлбараар Н.Энхболдыг санал болгосон байна. Дахин хэлэхэд, өчигдрийн байдлаар МАН-ын удирдлагууд ч Н.Энхболдын нэрийг хүлээн авч, нэлээн нааштай хандлага гаргажээ. Гэхдээ эцэст нь энэ их амбицан дунд нэр өөрчлөгдөж ирснийг сануулах нь зүйтэй юм. Үндсэн хуульд зааснаар Засгийн газрын гишүүнийг томилж, чөлөөлөх нь Ерөнхий сайдын бүрэн эрхийн асуудал юм.