Жараад оны Дашдондогийн Ганбат наяад оныхныг шүүмжилдэг. Наян он руугаа буцах гээд байгаа юм уу гээд. Л.Оюун-Эрдэнэ, Д.Амарбаясгалан нарыг хэлээд байгаа юм. Шүүмжлэх юм байлгүй яахав. Шүүмжлэлгүй л яахав. Гэхдээ наяад оны хоёр өчигдөр дал, жараад оны ах нарынхаа хийгээгүй хоёр шийдвэрийг голчтой гаргав, гаргуулав.
Нэгдүгээрх нь, Халдашгүй байдлын дэд хороогоор УИХ-аас түдгэлзүүлэх гурван гишүүнийг мөн чигээр гаргах шийдвэрийг шийтгүүлж чадав. Үүнийг Ц.Мөнх-Оргил, Б.Бат-Эрдэнэ, Н.Энхболд, С.Батболд, С.Бямбацогт нар Халдашгүй байдлын дэд хороогоороо өдөржин хуралдаж хэлэлцэн шийтгэв. Тэд гурван гишүүний түдгэлзүүлэхийг дэмжив.
Ингэснээр, тавиад оны Н.Энхболд, жараад оны Баагий аварга, Сү, Ц.Мөнх-Оргил, далаад оны сайд С.Бямбацогт нар О, А дарга нарынхаа шийдвэр хүсэл эрмэлзэлд нэгдэв.
Наяад оныхныхоо улс төрийн шийдвэр, эр зоригийг дэмжиж байна гэсэн үг. Жараад оны Дашдондогийн Ганбат дэмжиж буй нь лавтайяа. Эрх ашгууд, эх зорилгууд нэгдэж байна.
Хоёрдугаарх, гол шийдвэр бол Сонгуулийн хуулинд хүйсийн төлөөллийг тавин хувь байхаар шийдвэрийн саналыг Засгийн газраас өгөв. Засгийн газар бол тавиас наяад оныхны төгс цуглуулга, бүрдмэл байгаа. Энэ өнгөөс нь авч үзвэл, Засгийн танхим төгс шийдвэр гаргажээ. Амараа, Оюук дарга нарынхаа шийдвэр, итгэл үнэмшилд нэгдэж чаджээ.
Ингэж хүйсийн тавин нэгэн хувийнхаа эрх ашгийг шийдвэр гаргах түвшинд чиглүүлэх эхний алхмыг, хуулийн гал тогоо руу Засгийн газар бодитой гаргалаа. Монголын нийт эмэгтэйчүүдийн өмнөөс талархууштай.
Ийм шийдвэрийг үе үеийн эрх баригчдын аль ч нь гаргаж байсангүй, алдарт парламентч Лүндээ, Нямка нар ч үүнийг хийгээгүй нь үнэн юм. Одоо асуудал Г.Занданшатарт иржээ. Түүний парламент асуудлыг хэрхэн шийдэх асуудалд улаан нүүрээрээ тулжээ. Хэрэг эрхлэхийн дарга Д.Амарбаясгалан Халдашгүй байдлын хорооны шийдвэрийг дагана аа гээд мэдэгдчихсэн. Намынхаа бага хурлын гишүүдийн үнэмлэхүй хувийг “барих”, давхар эрх-дээлийн сонгодог загварчлал болсон Засгийн газрын хэрэг эрхлэхийн дарга, эрх баригч намын генсек түүний үг зарлиг буй за. Монголын за андгай буй гэдгийн үлгэрээр.
Ингэхээр Гомбожавын Занданшатарын парламент парламентэт ёсоо хадгалж, нэр төрөө жаахан ч гэсэн цэвэрлэж, далан хоёр гишүүнтэй болох нөхцөл байдал үүсэж байна. Энэ бол Монголын эрх ашиг аа, наяад оныхны эрмэгхэн шийдвэрийн үр ээ. Асуудлыг үтэр түргэн шийдэх хэрэгтэй.
Улмаар нөхөн сонгууль зарлах юм уу, ээлжит бус сонгууль хийх юм уу гэдэг нэн чухаг асуудалд тулна. Гомбожавын Занданшатар, Д.Тогтохсүрэнтэйгээ, Тогмидын Доржхандтайгаа, О.Цогтгэрэлтэйгээ яв цав нийцэмжтэй ажиллан, энэ бүхнийг хийх нь Монголын эрх ашиг юм. Энэ бол ялалт шүү. Жендерийн асуудлыг Засаг тань ингээд НҮБ-ын эрмэлзлэлд буюу ертөнцийн жишигт нийцүүлчихлээ.
Одоо хуулиа л гаргах үлджээ. Төрийн эрх барих дээд байгууллага парламент. Төрийн эрх барих дээд байгууллагын шийдвэр алдаатай гарах үндэс үгүй. Далаад оны Г.Занданшатар наяад оны намын удирдлагуудынхаа дэвшилтэт хандлагад хэрхэн нийцэж ажиллах, орхигдох эсэхийг Монголын ард түмний долоон сая нүд ширтээстэй. Гомбожавын Занданшатар хоёр дахиа спикер болсон.
Г.Занданшатар дарга аа, энэ бүх асуудлын эхийг онож шийдүүлэх гэж өөрийг тань төрийн эрх барих дээдийн даргаар хоёронтоо сонгосон нь Монголын ард түмний буян хишиг юм. Тийм болохоор Г.Занданшатар дарга ард түмнийхээ хүсэл зориг, эрх ашгаас зөрсөн шийдвэр гаргахгүй, гаргуулахгүй байх.
Ард түмэн бол боломжийг хулгайлсан хулгай луйврыг арилгаж, эх орон ариун байж, төр улс шинэ хүчирхэгээр төвхнөж, засаглал онон, төлөөлөл бэхжин, амар жимэр, чинээлэг амьдрахыг л хүсэж буй билээ л.
Үүнийг Г.Занданшатар дарга, Баянхонгорынхоо ард түмнээс эхлээд яв цав мэдэж байгаа нь түүний өнөө маргаашийн хурлаа удирдахаас нэн тодорхой харагдана. Гомбожавын Занданшатар спикертээ амжилт дэвшүүлье.
З.БАЯРАА
