Засгийн газраас хэрэгжүүлж эхэлсэн "Таван Ш" ажиллагааны Шилэн ажиллагааг хариуцаж буй Цахим хөгжил, харилцаа холбооны сайд Н.Учрал мэдээлэл хийлээ.

Тэрээр "Бид өнгөрсөн долоо хоногт есөн байгууллагын 3450 тусгай зөвшөөрлийг нээлттэй болгосон бол өнөөдрийн байдлаар shilen.gov.mn-д 18 байгууллагын 13586 тусгай зөвшөөрлийн мэдээлэл нээлттэй болсон байна. Улсын хэмжээнд 36 тусгай хамгаалалттай газар нутаг байдаг. Үүнээс 17-д нь газар олголт хийсэн.

Эхний ээлжид Богд хан уулын дархан цаазат газарт олгосон 2973 га болон Хөвсгөлийн байгалийн цогцолбор газарт олсон 501 га газар эзэмшигчдийн мэдээллийг нээлттэй болголоо. Эзэмшигчээр нь авч үзвэл 1071 иргэнд 299 га, 887 байгууллагад 3175 га газар олгосон байна. Тухайн газрыг эзэмшиж байгаа нь хууль бус биш.

Харин мэдээлэл нь ил тод байх ёстой. Мэдээллийг нь ил болгосноор газраа зориулалтын дагуу ашиглаж байна уу, төлбөрөө төлж байна уу гэдгийг нь хянах боломжтой. Засгийн газрын тусгай сангуудын мэдээллийг ил тод болгоно.

Өнөөдөр Байгаль орчин, уур амьсгалын сангийн 2020 оноос хойшхи мэдээллийг нээлттэй болгосон. Засгийн газрын 23 тусгай сан байдгаас эхний ээлжид 12 сангийн хөрөнгийн зарцуулалтын мэдээллийг ил болгохоор албан бичгийг хариуцаж буй сайд нарт нь илгээсэн.

Долоо хоног бүр ил болгосон мэдээллүүдийн талаар мэдээлэл өгнө. Мөн энэ долоо хоногт Олон нийтийн мэдээллийн ил тод байдлын тухай хуулийн хэрэгжилтийн талаар Засгийн газрын хуралдаанд мэдээлэл хийнэ. Үүний дараа Ерөнхий сайд төрийн байгууллагуудад үүрэг өгнө гэдгээ мэдэгдсэн.

Мэдээллээ ил болгоогүй төрийн байгууллагуудад хариуцлага тооцож ажиллана" гэлээ.