Зам тээврийн хөгжлийн сайд С.Бямбацогтын санаачилгаар зохион байгуулагдаж буй "Чанартай зам-Чансаатай засвар арчлалт" Монголын замчдын зөвлөлдөх уулзалт Төрийн ордонд болж байна. Ерөнхий сайд Л.Оюун-Эрдэнэ тус зөвлөгөөнд оролцож авто замчдад Монгол Улсын урт хугацааны хөгжлийн бодлого “Алсын хараа 2050", "Шинэ сэргэлтийн бодлого”-ын одоогийн үр дүнг танилцуулж, үүнд тус салбарын оролцоо чухлыг онцоллоо.
Засгийн газар “Шинэ сэргэлтийн бодлого”-д боомтуудыг авто замаар холбохоор тусгаж томоохон төслүүд эхлэн ажиллаж байна. Мөн Улаанбаатар хотод 225 км нэмэлт холбоос зам барихаар зураг төслийн ажил эхлээд байна. Эдгээрийг амжилттай гүйцэтгэхэд төр, хувийн хэвшил хамтран ажиллах, баригдаж буй замын чанар, засвар арчлалтыг сайжруулах зэргээр салбарын тулгамдсан асуудал, шийдлийн талаар ярилцлаа.
Өнгөрсөн 2 жилд Монголын авто замчид 689,1 км урт хатуу хучилттай зам, 330 у/м төмөр бетон гүүр барьж байгуулсан байна.
“Зам, тээврийн хөгжлийн төв” ТӨҮГ-ын захирал Х.Пүрэвжаргал:
“Замын засвар, арчлалттай холбоотой асуудал маш чухал. Нийт Монгол улсын авто замын сүлжээ насжилтын хувьд харилцан адилгүй. Сүүлийн жилүүдэд шинэ замууд эрчимтэй барьж байгуулж байна. Энэ хүрээнд Улсын нийслэлийг аймгуудын төвтэй хатуу хучилттай замаар холбох ажил 2022 онд бүрэн хийгдэж дууссан. Гэсэн хэдий ч эхэлж баригдсан замууд дээр насжилтын асуудал үүсдэг бөгөөд үүнийгээ дагаад эвдрэл, гэмтэл болон ачаа тээврээс үүдэлтэй даацын хэтрэлт гэх зэрэг шалтгаанууд гарч байна. Энэ жил зам тээврийн хөгжлийн сайд С.Бямбацогт зам засвар, арчлалтын тухай төсөл санаачилж, УИХ-аар батлуулан их засварын ажил хийгдэх гэж байна. Өөрөөр хэлбэл өмнө нь барьсан замуудыг арчилж, засварын ажил хийнэ. Энэ хүрээнд үндсэн таван чиглэлд засвар, арчилгаа хийгдэх хэдий ч боомтуудыг авто замаар холбох шинээр зам барих ажлыг орхигдуулахгүй” гэв.
Amlalt.mn
