Монголд нэг тэмцэл үргэлж хийгдэж байгаа. Өдөр бүр, цахимаар. Энэ бол ард түмний боломжийг эрх мэдэлтүүд тоносныг л шүүмжилж, энэ байдлаасаа болиоч ээ, татгалзаач ээ гэдгийг хэлээд, үг бардаг. УИХ-р дүүрэн бизнесмен гишүүн байгаа, эд бол бүгд түмний боломжийг хулгайлагчид.
Маш олон жишээгээр тодорхой. Хөгжлийн банк, нүүрсний, тендер, концессын хэргүүд. Үүнээс илүү тод нотолгоо байх гэж үү. Мэдээлэлд ойр, эрх мэдэлд суудалтайгаараа манай УИХ-ын гишүүд бүгд боломжийг хулгайлж байгаа. Үүнийгээ би тэр компанид хамааралгүй, миний ах дүү нар аваад явдаг гэж мянга тайлбарлаад нэмэргүй. Ганцхан бодит тайлбар байх ёстой. Тэр нь би эрх мэдэлд, мэдээлэлд ойроороо ард түмэндээ хардагдахгүйн тулд УИХ-д суухаа больё гэж хэлэхэд л үнэн тунхаглал нь гарах юм. Тэгээд энийгээ биелүүлж парламентаас явснаараа батлагдах юм.
Ц.Анандбазар, Б.Баттөмөр, Х.Ганхуяг, Сү.Батболдоос эхлээд бүгд бизнесмен. Өөр маш олон бий. Ийм хүмүүс. Ингэж УИХ-д эд нар шивээлчхээд шударга ёс ярих ямар ч боломжгүй. Нийтийн албанд хувийн ашиг сонирхлыг сэргийлэх, зохицуулах хуульд нэмэлт өөрчлөлт оруулж буйтай холбогдуулж өчигдөр Ерөнхий сайд Л.Оюун-Эрдэнэ үг хэллээ.
Загатнасан газар маажна гэгч болов. “Ард түмнээ төлөөлөх эрхэм үүргийг хувийн эрх ашгаа хангах эрх мэдэл хэмээн андуурсан авлигачид, тэдний эрх ашгаар томилогдсон бусармаг этгээдүүдийн харалган үйлдлээс болж, ардчилсан эрхзүйт төрийн амин сүнс болсон хууль тогтоох, гүйцэтгэх, шүүх засаглалын нэр хүндийг унагаж буй үйлдлүүдийг нэн яаралтай таслан зогсоож, төр-иргэний итгэлцлийг эргэн сэргээж чадахгүй бол авлига ардчилсан парламентын засаглалын аминд хүрэх аюултай” гэж тэр хэллээ.
Юу үнэн, энэ үнэн. Энэ ч үүднээсээ Таван Ш ажиллагаа явуулж тэмцэж байгаагаа тодотгосон. Үнэхээр манай УИХ-аар дүүрэн тонуулчин сууж байгаа учраас, эрх баригч намын дарга өөрөө ингэж тов тодорхой хэлж байна.
Үргэлжлүүлэн Ерөнхий сайд Л.Оюун-Эрдэнэ “Олон жил салаалж ургасан, суурь нь газрын хөрснөө бэхжиж томорсон, системийн авлигын аварга том царс мод нүд ирмэх зуур нурчихгүй нь ойлгомжтой. Худал мэдээллээр олон нийтийг төөрөгдүүлэхээс эхлээд хууль шүүхийн байгууллагад шигтгэсэн хувалзуудаараа хугацаа хожих, улмаар хулгайг хамгаалах зохион байгуулалттай тогтолцоо үүсгэх зэргээр авлигын эсрэг тэмцлийг саармагжуулахын тулд эцсийн бүх л мэхээ хэрэглэх болно. Бусад улс орнуудын авлигатай хийх тэмцлийн түүх ийм л байсан. Гагцхүү бид тууштай байж, ялах л учиртай. Мэдээлэл ил тод, нээлттэй болж, иргэд мэдээлэлжин хэрсүүжих тусам авлигын систем задран унасаар байх болно. Зөв зүйл, үнэн байдал ялах нь цаг хугацааны л асуудал байдаг нь ардчилсан нээлттэй засаглалын давуу тал билээ” гэж хэлэв.
Бас “Энэхүү хуулийн төсөлд дээр дурдагдсан албан тушаалтнуудаас гадна Улсын Их Хуралд суудал бүхий намын дарга нар, Үндсэн хуулийн цэцийн гишүүн, Улсын дээд шүүхийн Ерөнхий шүүгч, Улсын дээд шүүхийн шүүгч, Улсын Ерөнхий прокурор болон Төрийн албаны зөвлөл, Монголбанк, Сонгуулийн ерөнхий хороо, Авлигатай тэмцэх газар, Тагнуулын ерөнхий газар, Цагдаагийн ерөнхий газар, Гаалийн Ерөнхий газар, Онцгой байдлын ерөнхий газар, Татварын ерөнхий газар, Төрийн өмчийн бодлого зохицуулалтын газар, Төрийн худалдан авах ажиллагааны газар, Улсын бүртгэлийн ерөнхий газар, Нийгмийн даатгалын ерөнхий газар, Хөдөлмөр, халамжийн үйлчилгээний ерөнхий газар, Иргэний нисэхийн ерөнхий газар, Ашигт малтмал, газрын тосны газар, Үндэсний геологийн алба, Эрүүл мэндийн даатгалын ерөнхий газар зэрэг Улсын Их Хурал болон Засгийн газарт ажлаа тайлагнадаг байгууллагын дарга, орлогч нар, тэдний хамаарал бүхий этгээдүүдэд мөн адил хамаарах болно. Энэхүү хууль батлагдсанаар улс төр, бизнесийн хэт хамаарал зааглагдаж,төр нь төр шиг, бизнес нь бизнес шиг байх ёс зүйн заагийн эхлэл цэг болох юм” хэмээн гүйцээж хэллээ.
Одоо үүнийг спикер Гомбожавын Занданшатарын парламент нэн даруй хэлэлцэн батлах учиртай. Энэ хуулийг ягштал биелүүлбэл эрх тэгш хэм хэмжээ бүх түвшинд үйлчилж, УИХ, Засгийн газарт орж, өөрийгөө бөөцийлөх, эрх мэдэл, мэдээлэлд ойроороо бүх баялгийг хамагчид хүссэн хүсээгүй тонилох нь гарцаагүй.
Б.БАЯР
