Эрх баригч намын бүлгийн дарга Д. Тогтохсүрэн гишүүдийг муулсаар байгаад муу болгочихсон аятай үгийг хэлэв. Хаанаас даа. Муу болохоор л муу гэж дүгнэж байгаа билээ дэг. Ард түмэн парламентын илэрхийлэл. Парламент ард түмний сонголт. Сайн хийлгэх гэж, сайн засаглалыг л бий болгуулах гэж УИХ-аа, төрийн эрх барих дээд байгууллагаа ард түмэн сонгодог. Яагаад сайныг иш болгон сонгочихоод, өнөөдөр муугаар дүгнэж байгааг ганцхан жишээгээр хэлье. Сонгууль болгоноор баахан лоозон хэлж, тэр нь ердөө биелдэггүйд л байгаа юм.
Манай сайт амлалтыг нэхье гээд, нийгмээ сэрээхэд цучил ч болтугай болъё гээд ажиллаж байгаа. Энэ учир өнгөрөгч сонгуулиар эрх баригчдын амласныг эргээд сөхөөд харахаар гялайх зүйл бараг үгүй. Ингэж хэлсэндээ, хийсэндээ эзэн болохгүй болохоор л ард түмэн дургүйцэн муучилж байгааг ойлгож ядах юмгүй.
Энэ хаваржин УИХ, эрх баригчид нүүрсний хулгай ярьсан. Одоо Түр хороо нь сонсголоо явуулж чадахгүй байж байна. Үндсэн хуулийн өөрчлөлтийг хийе гээд ард түмнээс асуухад, ард түмэн амьдралын дорой байгаагаа л бухимдан хэлж байна. Ард түмнээ ядуу амьдруулаад байгаагийн шалтгаан чинь л засаглалын оночтой бусаас үүдэн Үндсэн хуулиа өөрчлөхгүй бол болохгүйд байна аа гэж хууль тогтоогчид яриад байгаа бус уу. Амьдралаа сайжруулахын тулд, хөдөлбөргүй засаглалтай болохын тулд үүнийг хийх учиртай байна гэдгийг сөргүүлэн тайлбарлаж, ойлгуулж, ухуулах учиртай болохоос бус, тэтгэвэр , цалин нэмэхийг л ард түмэн шаардаж байна гэж загнуулсан хүүхэд шиг уруу царайлан ирж байгаа УИХ-ын гишүүдийг үзвээс, хэнд ч өрөвдөн дургүйцэх эн ихэдлээ.
152 гишүүнтэй болно гэж хэдхэн хоногийн өмнө ярьж шийдвэрлэснээ 126 болгож байх шиг байна. Тавин хувийг пропорцианоль, тавин хувийг мажаротороор сонгоно гэснээ жар дөчийн харьцаатай болгоно ч гэх шиг. Ганцхан өдрийн дотор. Ингээд гуйвж дайваад, итгэл үнэмшлээ, төр барьж байгаа дархлааны утга учрыг хором мөчид эргүүлээд байвал, хэтийн сайнд ямархуу үнэлгээ үүсгэхийг тааж ядах юмгүй. Үнэн харамсмаар.
Нийгэмд үүссэн бухимдал өчнөөн. Энэ бол ердөө л хууль тогтоогчдын, эрх баригчдын л буруу. Ард түмэн төр барьж, хөгжлийг бүтээ гэдгээр л сонгож өгснөөс өөр буруугүй. Нүүрсний дөчин их наядын хулгайтай сууж байгаа улс орныг хэрхэн үзэх билээ. Даан ч халаглан харамсмаар. Аргагүй л далан сая малынхаа буянд амьдрал тоолж яваа улс. Далын далан сая малтай байж, дэлхийн супер гүрнүүдээс үнэтэй мах иднэ. Ганц ч олигтой боловсруулах үйлдвэр байхгүй.
УИХ бол төрийн эрх барих дээд байгууллага. Бүх эрх мэдэл байна. Гурав гаруйхан сая хүнтэй, газрын хэвлийн баялаг нь хүн бүрт ноогдохоороо дэлхийд тэргүүлэгч энэ улсыг улсын зэрэгт хүргэж эс чадах хууль тогтоогчдыг үнэндээ л үл ойлгом.
Спикер Гомбожавын Занданшатар гэдэг хүн хоёр дахиа УИХ-ыг толгойлж байна. Төрийн эрх барих дээд байгууллагын даргаар ингэж дахин ажилласан хүн Монголд байхгүй. Таны ажилласан жилүүдэд монголчууд ямар сайныг үзэв гэж эргэн харахад таны толгойлсон парламент дөчин их наядын хулгайтай парламент байсан гэдэг л үлдэж мэдэх нь дээ.
Эрхэм скипер Та, энэ хаваржин ярьсан, ярьсаныг тань давтан тал талаасаа “донгодсон” энэ олон хөхөө шиг гишүүнтэйгээ хамт ярьсан болгоноо биелүүл ээ. Үндсэн хуулиа өөрчилсөн шиг өөрчил, агуулгаа хадгал. Сонгуулийн хууль , намуудын хуулиа өөрчилсөн шиг өөрчлөөд, энэ ард түмэнд буян бол. Та бүхэн хангалттай ярьсан. Нийгмийн оюун санаа бүхий цөм ойлгоод хүлээж байгаа шүү дээ. Дөчин их наядын хулгайн асуудлыг шийдээгүй, үнэ ханш хөөрөгдүүлсэн, иргэдийн амьдралыг доройтуулсан зэрэг өөрсдөөс тань үүдсэн нийгмийн бухимдлаар нийтлэг Үндсэн эрх ашгаасаа огтоос ухарч болохгүй. Гомбожавын Занданшатар та ажлаа утгаар нь хий!
З.БАЯР
Amlalt.mn
