Н.Энхболд нарын УИХ-ын дөрвөн гишүүний өргөн барьсан "УИХ-ын сонгуулийн тухай хуульд нэмэлт өөрчлөлт оруулах тухай" хуулийн төслийн анхны хэлэлцүүлгийг Төрийн байгуулалтын байнгын хорооны хуралдаанаар явуулав.
УИХ дахь МАН-ын бүлгийн дарга Д.Тогтохсүрэн уг хуулийн төслийг танилцуулсан юм.
Тэрбээр "Үндсэн хуульд оруулсан өөрчлөлттэй холбогдуулан УИХ-ын сонгуулийн тухай хуулийн төсөлд дараах өөрчлөлтийг тусгасан байна.
- УИХ-ын 126 гишүүний 78 гишүүнийг мажоритар аргаар, 48 гишүүнийг пропорционал аргаар сонгох
- Гадаад улсад суугаа иргэдээс санал авах өдрийг УИХ тогтоох бөгөөд дөрөв хүртэлх өдөр байх
- Сонгогч тухайн тойргийн мандаттай тэнцүү тооны нэр дэвшигчид болон нам эвсэлд санал өгөх
- Төрийн аудитын дээд байгууллага нам эвсэл, бие даан нэр дэвшигчийн мөрийн хөтөлбөр, хандивын тайлан гаргах, сонгуулийн зардлын дээд хэмжээг батлах
- Сонгуулийн зардлыг бууруулах чиглэлээр тойрог тус бүрд нэр дэвшигчдийн зурагт хуудсыг байрлуулсан нэгдсэн самбартай байх
- Нам нэр дэвшүүлэхдээ намын гишүүн, дэмжигчээсээ мөнгөн болон мөнгөн бус хандив, үйлчилгээ, дэнчин авахыг хориглох, шударга ёсны зарчим баримталж, нийгмийн төлөөллийн оролцоог бүрэн хангах
- Жагсаалтаар нэр дэвшигчийн сонгуулийн сурталчилгааг нам эвслийн сонгуулийн байгууллага эрхлэн явуулах
- Сонгуульд оролцож буй нам эвсэл хоёр удаа цахим хэлбэрээр нэрсийн жагсаалтыг өгөх зэрэг асуудлыг хуулийн төсөлд тусгасан" хэмээв.
Үргэлжлүүлэн "Нам эвслийн нэрсийн жагсаалтаар нэр дэвшиж буй хүмүүсийн сонгуулийн сурталчилгааг нам юм уу эвсэл нь хийнэ. Өмнө нь сурталчилгаа хийхийг хориглодог байсан бол одоо нэгдсэн сурталчилгаа хийхийг нээж өгсөн. Түүнчлэн сурталчилгааны нэгдсэн хэвлэх материалыг гурван хуудаснаас хэтрүүлэхгүй хийх юм. Цахим сурталчилгаа хийнэ. Гэхдээ үүний зардлын хэмжээ нь нийт зардлын 15 хувиас хэтрэхгүй гэдэг заалт бий" гэдгийг онцоллоо.
Amlalt.mn
