Цахим шилжилтийг үндэсний хэмжээнд эрчимжүүлэх, төрийн цахим үйлчилгээний чанар, хүртээмжийг нэмэгдүүлэх, иргэдийн цахим ур чадварыг дээшлүүлэх зорилгоор үндэсний хэмжээнд өрнүүлж буй “Цахим хөгжлийн өдөрлөг”-ийг 21 аймагт зохион байгуулж байна.
“Цахимд хэвшье” уриатай сургалт, өдөрлөг, үзэсгэлэн, мэргэжлийн зөвлөх үйлчилгээнээс бүрдсэн цогц үйл ажиллагааг 04 дүгээр сарын 10-ны өдөр Увс аймагт зохион байгууллаа.
Үйл ажиллагааны хүрээнд “И-Монгол академи” УТҮГ-ын Процесс аналист Г.Будням “Орон нутгийн төрийн үйлчилгээнд процессын шинжилгээ хийх, дахин загварчилж төрийн үйлчилгээний нэгдсэн системд холбох төсөл”-ийг аймгийн удирдах албан тушаалтнуудад танилцуулсан.
Мөн Увс аймгийн Засаг даргын эрхлэх асуудлын хүрээний 23 агентлаг, 19 сумын 206 төрийн албан хаагчид “Төрийн албан хаагчдад зориулсан DOCX, ERP, SUDALGAA.GOV.MN болон EKids систем”-ийн танилцуулга сургалтыг Сургагч багш О.Билгүүн орлоо.
Түүнчлэн “Цахим хөгжлийн өдөрлөг”-ийн үеэр Хэрэглэгчийн үйлчилгээний хэлтсийн оператор М.Золзаяа иргэдэд E-Mongolia платформын ашиглалтын талаарх заавар, зөвлөгөөг өгч ажиллав.
“Цахимд хэвшье” үндэсний хэмжээний үйл ажиллагааг зохион байгуулах ажлын хэсгийг ЦХХХ-ны дэд сайд Ж.Эрхэмбаатар ахлаж байгаа бол баруун таван аймагт “И-Монгол академи” УТҮГ-аас дөрвөн хүний бүрэлдэхүүнтэй баг ажилласан юм.
“Цахим хөгжлийн өдөрлөг” үйл ажиллагааг ЦХХХЯ түүний харьяа, салбар байгууллагуудын дэмжлэгтэйгээр харилцаа холбоо, мэдээллийн технологийн салбарын төр, хувийн хэвшлийн 30 орчим байгууллагын оролцоотойгоор хамтран зохион байгуулж байна.
