Улс төрийн намуудын төлөөлөл нэгдэж, Сонгуулийн ерөнхий хороонд шаардлага хүргүүлж буйгаа мэдэгдлээ. Энэ талаар ХҮН намын дарга Т.Доржханд "Улс төрийн долоон нам нэгдэж СЕХ-нд шаардлага хүргүүлж байна. Шаардлага хоёр агуулгатай. Нэг дэх нь Монгол Улсын түүхэнд маш чухал сонгууль болох гэж байна. Парламентын 126 гишүүнийг сонгоно. 78 гишүүнийг тойргоос, жагсаалтаар 48 гишүүнийг сонгоно. Үр дүнд нь парламентад олон намын төлөөлөл бүрдэнэ гэдэг хүлээлт байгаа. Харин саналын хуудасны асуудал байна. Саналын хуудас хоёр хуудас байх ёстой. Тойргоос сонгох хэсгийг нэг хуудаст, жагсаалтыг хоёр дахь хуудаст хэвлэе. Тойргийн сонголтыг буруу хийж, санал хүчингүй боллоо гэхэд нам эвслийг сонгох хэсэг ч хүчингүй болно. Тиймээс тусад нь хоёр хуудаст хэвлэх шаардлагатай гэж үзэж байгаа юм.
Хоёрдугаарт, саналын хуудаст улс төрийн намыг Дээд шүүхэд бүртгүүлсэн дарааллаар жагсаан бичдэг. Одоогоор 30 орчим нам, эвсэл сонгуульд оролцох төлөвтэй байна. Тэгэхээр маш олон нэртэй урт жагсаалт гарч хүмүүс андуурах эрсдэл байна. Тиймээс саналын хуудаст намын нэрийн өмнө дугаар тавьж, даргын нэрийг, логотой нь хэвлэх шаардлага хүргүүлж байна. Ингэхгүй бол ард иргэд төөрөлдөнө" гэсэн юм.
