Дорнод аймгийн Засаг дарга М.Бадамсүрэн хамгийн олон буюу найман жил тогтвор суурьшилтай ажилласан Засаг дарга нарын нэг болжээ. Тэрээр ард иргэдийн итгэлийг дааж, олон удаа сонгогдсон байна. Аймгийн төсвөө бие даан бүрдүүлж, улсын төсөвт татаас өгдөг зургаан аймгийн нэг болгож чадсан юм.
Түүний аав нь Дорнод аймгийн Халхгол сумын МУСГЗ Ялалт музейн захирлаар олон жил ажилласан. Тус музейгээр зочилсон иргэдэд Халхын голын байлдааны түүхийг
дайны талбарт байгаа мэт сэтгэгдэл үлдээтэл сайхан ярьдгаараа танигдсан хүн. Ээж нь Сүхбаатар аймгийн Онгон суманд төрсөн.
Тэрээр Нефть ба хийн хадгалалт тээвэрлэлт, Төрийн захиргааны менежер мэргэжилтэй. Дорнод аймагт 2009-2012 онд аймгийн Монгол Ардын Хувьсгалт намын хорооны дэд дарга, 2012-2014 онд Монгол Ардын Хувьсгалт намын хорооны дарга, 2014-2015 онд Дорнод аймгийн Засаг даргын орлогч, 2015 оноос одоог хүртэл Дорнод аймгийн 26 дахь Засаг даргаар ажиллаж байна.
М.Бадамсүрэн газрын тосны инженер мэргэжилтэй учир уул уурхайн компаниудын хариуцлагагүй үйл ажиллагаатай тууштай тэмцэж, Засгийн газарт зэмлүүлж байжээ. Уул уурхайн компаниудтай нийгмийн хариуцлагын гэрээг байгуулж, сүүлийн зургаан жилийн хугацаанд Орон нутгийн хөгжлийн сандаа 20 гаруй тэрбум төгрөгийг төвлөрүүлж, байгалийн нөхөн сэргээгддэггүй баялагаас орж буй энэ орлогыг нөхөн сэргээгддэг баялаг болгож, хөдөө аж ахуй, хүний хөгжлийн салбарт зарцуулан ажиллаж байна. Мөн аймгаа бичил уурхайгүй аймаг болгосон.
Тэрээр “Хүн хөгжсөнөөр аймаг, улс орон хөгжинө” гэдэг зарчмыг баримтлагч хүний хувьд хөгжил тэр дундаа хүүхдийн хөгжлийг бодитоор дэмжигч юм. Улсын хэмжээнд үлгэр жишээ болох олон төслүүдийг санаачилан хэрэгжүүлсэн. Тухайлбал, Хүн болох багаасаа, Эмчийн туслах, Багшийн туслах, Нутгийн ирээдүй оюутны сургалтын тэтгэлэг, сумдад төрийн албан хаагчийн орон сууц, Арван мянган хүлэмж, жимсний мод тариалъя, Орон сууцтай багш, сувилагч буюу Дорнодын багш, Би сувилагч болзолт зэрэг олон сайхан ажил болон уралдааныг зохион байгуулжээ.
Түүнчлэн бага ангийн бүх багш нарийнхаа нийгмийн хамгааллын асуудлыг дэмжиж, зоримог ажлуудыг хэрэгжүүлж байгаа. Аймгийнхаа боловсролын салбарыг дэмжин ажиллаж, улсын хэмжээнд элсэлтийн ерөнхий шалгалтын үнэлгээгээр тэргүүлэгч аймгуудын эгнээнд орсон. Сүүлийн зургаан жилд энэ амжилтаа хадгалж байна.
Мөн бүх сумын сургуулийн ширээ сандлыг бүрэн шинэчилж, сумдынхаа сургууль, цэцэрлэг, дотуур байр, эмнэлгийн нөхцөл байдлыг 100 хувь боловсон ариун цэврийн байгууламжтай болгож, модон жорлонг халж чадсан анхны аймаг болж чадсан.
Энэ нь Засаг даргын чин сэтгэл, эр зориг, ур чадвар, аливаад үнэнч бодитой ханддаг алсын бодол, бодлогын илрэл юм. Хийж бүтээсэн ажил үйлсээрээ гялалзаж яваа тэрбээр төрд яах аргагүй хэрэгтэй хүний нэг мөн.
Б.БАЯРМАА
