“Монгол Улс болон Евразийн эдийн засгийн холбоо (ЕАЭЗХ)-ны орнуудын худалдаа, эдийн засаг, хөрөнгө оруулалтын хамтын ажиллагааг хөгжүүлэх хэтийн төлөв” сэдэвт эрдэм шинжилгээний бага хурал өнөөдөр Оросын шинжлэх ухаан соёлын төвд болж байна.
Эрдэм шинжилгээний хурлыг ОХУ-ын ЭСЯ, Ерөнхийлөгчийн академиас зохион байгууллаа. Эрдэм шинжилгээний хуралд Орос, Монголын төрийн болон хувийн компаниудын төлөөлөгчид, эрдэмтэн судлаачид олон чиглэлийн илтгэл танилцууллаа.
Д.Балдорж: Цагаан нуур боомтонд зураг төслийн ажил хийгдэж, санхүүжилт шийдэгдсэн
Хилийн боомтын захиргааны үйл ажиллагааны хэлтсийн дарга Д.Балдоржоос тодрууллаа.
-Та илтгэлдээ ямар төслийг онцолж, танилцуулсан бэ?
-Монгол Улсын Засгийн газраас дэвшүүлсэн Шинэ сэргэлтийн бодлогын хүрээнд боомтын сэргэлтийн зорилтын хүрээнд хэрэгжиж байгаа төсөл, хөтөлбөр, одоогийн нөхцөл байдал, авах арга хэмжээний талаар танилцууллаа.
Манай улс 39 боомттой. Үүнээс 16 боомт нь ОХУ-тай хиллэдэг. Бид боомтын сэргэлтийн бодлогын хүрээнд ОХУ-тай хиллэдэг боомтын хүчин чадлыг нэвтрүүлэх төлөвлөлтийн уялдаа холбоог хангах чиглэлээр ОХУ-ын боомтын асуудлыг эрхэлсэн холбогдох байгууллагуудтай хамтарч ажиллаж байна.
10 боомтын хүчин чадлыг нэмэгдүүлэхээр хамтарч ажиллаж байгаа. Жишээ нь, Цагаан нуур боомтонд зураг төслийн ажил хийгдэж, санхүүжилт шийдэгдсэн. Ульхан боомтын хөрөнгө оруулалт яригдаж байна. Төр хувийн хэвшлийн түншлэлийн хүрээнд зарим төслүүд хийгдэж байна.
-Монгол Улсын Засгийн газар, Евразийн Эдийн засгийн зөвлөл хамтран ажиллах тухай санамж бичгийн хүрээнд үйл ажиллагааны төлөвлөгөөг 2022-2025 он хүртэл сунгахаар тохиролцож, протоколд гарын үсэг зурсан. Гарын үсэг зурснаар манай улсын хөгжил ямар үр дүнд хүрэх вэ?
-Евразийн Эдийн засгийн зөвлөл бусад орнуудтай хамтран ажиллах бодлогын хүрээнд оролцогч байгууллагууд форум, хэлэлцүүлэгт оролцсноор хамтарч шийдэх асуудлууд байдаг. Энэ нь эдийн засгийн өндөр ач холбогдолтой. Бид өнөөдрийн хуралдаанд ирээдүйд өсөн нэмэгдэх хэрэгцээ шаардлага зэрэг саналуудын талаар ярилцлаа. Холбогдох судлаач, эрдэмтэн доктор болон бусад салбарын хүмүүс оролцож, санаа бодлоо хэллээ. Энэ чиглэлд хамтран ажилласнаар шинэ үр дүнгүүд, боломжууд харагдаж байна.
Евразийн Эдийн засгийн зөвлөлийн Аж үйлдвэрийн бодлогын газрын захирал Н.Г.Кушнарев:
-Бид Евразийн гишүүн орнуудын хувьд түүхэн уламжлалт харилцааг хэрэгжүүлж ирсэн түүхтэй. Жишээ нь, Орос-Монгол хоёр улсын уул уурхайн салбар дахь стратегийн түншлэлийн харилцаанд "Монголросцветмет" ТӨҮГ-аар дамжуулан хамтын ажиллагааг үр дүнтэй хэрэгжүүлсэн. Монгол улсад уул уурхайн салбар зонхилдог. Манай Евразийн гишүүн орнуудтай өөрсдийн мэдлэг чадавхи, тоног төхөөрөмж, технологи, мөн боловсон хүчнээ солилцох бүрэн нээлттэй юм.
Евразийн Эдийн засгийн зөвлөлийн хүрээнд технологийн хэлэлцүүлэг өрнөдөг. Энэ талбарт Монголын төр болон уул уурхайн хувийн хэвшлүүд, эрдэм шинжилгээний байгууллагуудын судлаачид зэрэг хүмүүс оролцож технологийн шийдэл, бүтээгдэхүүний үр ашгийг дээшлүүлэхэд хамтарч ажиллах боломж байдаг гэдгийг хэлье.
Зөвлөлтийн дараах орон зайн Орос, Армен, Беларусь, Казахстан, Киргиз гэсэн таван улсаас бүрдэх Евразийн эдийн засгийн холбоо (ЕАЭЗХ) хэмээх интеграцийн нэгдэл нь 2015 оны 1-р сарын 1-нээс эхлэн үйл ажиллагаагаа эрхэлж байна.
Эдийн засгийн холбоог Евразийн эдийн засгийн нийгэмлэг (ЕврАзЭС), Гаалийн холбоо, Эдийн засгийн нэгдсэн орон зай зэрэг гишүүн орнуудын хуримтлуулсан харилцан үйлчлэлийн туршлага дээр үндэслэн үүсгэн байгуулсан.
ЕАЭЗХ-ны тухай гэрээний дагуу тус холбооны үйл ажиллагааны гол үүрэг нь гишүүн орнуудын ард иргэдийн ахуй амьдралыг сайжруулах зорилготой. ЕАЭЗХ-ны өнөөгийн үйл ажиллагаа нь «Евразийн эдийн засгийн интеграчлалыг 2025 он хүртэл хөгжүүлэх стратегийн чиглэлүүд»-ийн заалтуудад түшиглэдэг. ЕАЭЗХ-ны олон улсын хамтын ажиллагаа нь эрх тэгш, харилцан ашигтай, бие биенээ харилцан хүндэтгэх зарчмуудад суурилдаг.
Б.БАЯРМАА
