Бүгд Найрамдах Киргиз Улсын Баткен мужийн төлөөлөгчид Дундговь аймагтай хамтын ажиллагаа эхлүүлэх, жимс, жимсгэнэ, мал аж ахуйтай танилцах зорилгоор Дундговь аймагт айлчилж байна.

Тус айлчлалд БНКУ-ын Ерөнхийлөгчийн Баткен муж дахь бүрэн эрхт төлөөлөгчийн орлогч Ташбалтаев Абдрашит Каримович, Баткен мужийн Кадамжай дүүргийн дарга Баяке уулу Болоткан, БНКУ-ын Ерөнхийлөгчийн Баткен муж дахь Бүрэн эрхт төлөөлөгчийн зөвлөх Султанов Мамасыдык Мамадиевич, мөн төрийн болон хувийн хэвшлийн төлөөлөл багтаж байна.

Бүгд Найрамдах Киргиз Улсын Баткен мужийн албан ёсны төлөөлөгчдийг Дундговь аймгийн Засаг дарга С.Мөнхчулуун болон холбогдох албаны хүмүүс хүлээн авч уулзлаа.

Уулзалтын үеэр Дундговь аймгийн Засаг дарга С.Мөнхчулуун Дундговь аймгийн хувьд бүс нутгийн хамтын ажиллагаанд идэвхтэй оролцож, түншлэлээ өргөжүүлэхэд онцгой анхаарч байгаа бөгөөд тус улстай байгаль орчинд ээлтэй, ногоон дэд бүтцийг бий болгох, газар тариалан тэр дундаа жимс, жимсгэний тариалалтыг хөгжүүлэх, орон нутгийн үйлдвэрлэлийг хөгжүүлж малчдын орлогыг нэмэгдүүлэх, аялал жуулчлал, хүүхэд, залуусын боловсрол, солилцоо, туршлага судлах, хүнсний үйлдвэрлэлийг хөгжүүлэх зэрэг чиглэлээр илүү нягт хамтран ажиллах, харилцан итгэлцэл, ойлголцолд суурилсан бодит хамтын ажиллагааг хөгжүүлж, бүс нутгийн тогтвортой хөгжилд хувь нэмэр оруулах хүсэл, итгэл дүүрэн байгаагаа илэрхийллээ.

Айлчлалын хугацаанд Баткен мужийн төлөөлөлчид Дундговь аймгийн хөдөө аж ахуй, газар тариалан, жижиг дунд үйлдвэрлэл, аялал жуулчлалын салбартай танилцах юм.