“Бүтэн Ардчилал” бүх гишүүдээс санал авах мөрийн хөтөлбөрийн хэлэлцүүлэг Сүхбаатар, Чингэлтэй дүүрэгт амжилттай зохион байгуулагдлаа.
Хэлэлцүүлэгт Ардчилсан намын дарга Лу.Гантөмөр, Ардчилсан намын дэд дарга Ч.Өнөрбаяр, Ардчилсан намын дэд дарга И. Мөнхжаргал, Сүхбаатар дүүргийн Засаг дарга Х.Болормаа, Ардчилсан намын Хэрэг Эрхлэх газрын дарга, ҮБХ-ны гишүүн Н. Лхагвадорж, Ардчилсан намын даргын зөвлөх А.Ганбаатар, Ардчилсан намын даргын зөвлөх Ж.Баясгалан, Сүхбаатар дүүргийн ИТХ-ын дарга, ҮБХ-ны гишүүн Б. Энхболд, НИТХ дахь АН-ын бүлгийн дарга Б.Эрдэнэсүх, ҮБХ-ны гишүүн Ц. Баатархүү, НИТХ-ын төлөөлөгч, ҮБХ-ны гишүүн Д.Бадарсан, ҮБХ-ны гишүүн Б.Хурц, ҮБХ-ны гишүүн Г.Баярсайхан, ҮБХ-ны гишүүн Б.Лакшмий, ҮБХ-ны гишүүн Ж.Баяржавхлан, ҮБХ-ны гишүүн Л.Наранбаатар, Чингэлтэй дүүргийн Ардчилсан намын дарга Д.Баянмөнх, Ардчилсан намын Нарийн бичгийн дарга Н.Гансүх, Нийслэлийн АН-ын дэд дарга Ж.Энхбат нарын төлөөлөл, Ардчилсан намын ҮБХ-ны гишүүдийн төлөөлөл, Чингэлтэй, Сүхбаатар дүүргийн Ардчилсан намын гишүүд оролцлоо.
Ардчилсан намын дарга Лу.Гантөмөр: Ардчилсан нам засгийн эрхийг барьж байхдаа Монгол Улсад хийгдээгүй маш олон бүтээн байгуулалтыг хийж чадсан гэдгийг онцоллоо.
Тэрбээр “Коммунистууд сүүлийн 30 жилийг онилж ярих боллоо. Тэднийхээр сүүлийн 30 жилд хот байгуулагдсан нь, монголчууд 60 сая малтай болсон нь, 100 гаруй мянган залуус гадны улс руу явж суралцсан нь буруу гэнэ.
Сүүлийн 30 жилд иргэд сая гаруй машинтай болсныг, 400-500 өрх орон сууцанд орсныг, 250 мянган залуус ипотекийн зээлд хамрагдсаныг үгүйсгэж байна. Ардчиллыг үгүйсгэж байна. Ардчилсан нам Монголд ардчиллыг, үг хэлэх эрх чөлөөг, эд хөрөнгөтэй байх боломжийг авчирсан нь үнэн. Гэтэл болохгүй байгаа зүйлсийг болгохын төлөө зүтгэсэн нэгнийг ялладаг, буруутгадаг, дардаг, хооронд нь хагаралдуулах болсон.
Орон сууц, зам харгуй, цахилгаантай болох, хүүхдийн мөнгө олгох санаачилгыг бид гаргаж байсан. 2012 онд хамтарсан Засгийн газар байгуулсан хугацаанд ямар азаар бид аймгуудыг засмал замаар холбож, Улаанбаатар хотын түгжрэлийг бууруулахын тулд олон уулзваруудыг хийж, зуслан руу авто зам тавьж, Налайх, нисэх рүү зам тавьсан юм бэ.
Э.Бат-Үүл, С.Баттулга дарга нарт баяр хүргэх ёстой. Гэтэл нөгөө талд Засаг юу хийв. Жил бүр нэг тэрбум ам.долларын өрийг бидэнд үлдээж байна. Захын нэг ажилтных нь шүүгээнээс долоон тэрбум төгрөг олддог, өгч байгаа ял нь 40 саяын торгууль байна.
МАН найман жил засагласан ч, мөрийн хөтөлбөрийнхөө 90 хувийг биелүүлж чадаагүй. Иргэд төрд итгэхээ больсон. Ардчилсан нам цаашдаа том зорилгын төлөө эвлэлдэн нэгдэж, сахилга бат, хариуцлагатай байж чадвал ялна” гэдгийг онцоллоо.
Хэлэлцүүлгийн үеэр Ардчилсан намын ҮБХ-ны гишүүн Ц.Баатархүү:Өнөөдөр Монгол Улсад өрийн дарамт нүүрлэлээ. Нэг хүнд оногдох өр 23 сая төгрөг болтол өссөн нь Ардчилсан нам засаглаж байх үетэй харьцуулахад 2.4 дахин нэмэгдсэн байна. Ардчилсан намын бодлого иргэддээ өр биш өв үлдээдэг, өртэй биш хуримтлалтай Монгол Улсын төлөө бодлого баримталж байна.
Ардчилсан нам ялсан үедээ реформ хийж чаддаг. Нийслэл Улаанбаатар хотод 4 жилийн хугацаанд 40 жил хийж чадаагүй бүтээн байгуулалтыг хийж чадсан. Утаатай, түгжрэлтэй тэмцэж чадсан. Асуудлыг сууриар нь шийдэж чаддаг нам юм. Дулааны, цахилгааны станцыг байгуулсан, зам, дэд бүтцээ хөгжүүлсэн гээд бидэнд хийсэн бүтээсэн, бодлогын өөрчлөлтүүд бий. Харин өнөөдөр монголын төр бодлого үйлдвэрлэж чадахгүй байна. Нийслэл хотыг хөгжүүлэх ерөнхий төлөвлөгөөний биелэлт ердөө 30 хувь. Бодлого ярихын оронд дан урт хугацааны биелж дуусдаггүй амлалтаар хуурсаар байна. Монголын төрд ирсэн дарга болгон ямар нэг төсөл, ямар нэг тендер нэрээр татвар төлөгчдийн мөнгийг үр ашиггүй зарцуулах боллоо.
Төрийн албыг цомхотгомоор байна, нийслэл хотод ирсэн дарга бүр нь өөр төсөл ярьдаг нэгдсэн бодлого, төлөвлөлт үгүй байна. Дүүжин тээвэр, метроны зургаар ард иргэдээ хуурах боллоо. Хэн нэг даргынх нь гэрээс, сейфээс 7 тэрбум төгрөг гарч ирж байна. Энэ бол 7 цэцэрлэг барих хэмжээний мөнгө. Бүтэн өөрчлөлтийг хийхийн тулд баялгийн реформыг хийх шаардлагатай байна. Байгалийн баялгийг сонгуульд зориулж үр ашиггүй тараадаг үйлдлээ болиод хамгийн зөв, оновчтой үр ашиг бүхий санг байгуулдаг байх хэрэгтэй. Улаанбаатарыг хот шиг хот болгохын тулд Улаанбаатар хотын даргыг нам томилдог биш иргэд сонгодог, Улаанбаатар хотыг хот төлөвлөгчид, барилгын инженерүүд удирддаг байх хэрэгтэй байгааг хэллээ.
