Хот байгуулалт, барилга, орон сууцжуулалтын сайд Э.Бат-Амгалан болон тус яамны холбогдох албан тушаалтнууд өнөөдөр /2025.08.12/ орон сууц, нийтийн аж ахуйн салбарын 2025-2026 оны өвөлжилтийн бэлтгэл ажлын гүйцэтгэлтэй танилцлаа.
Цахим хуралд орон нутгийн төлөөлөл болох аймгуудын Засаг дарга нар, “Барилгын хөгжлийн төв” ТӨААТҮГ-ын захирал Т.Пүрэвхатан, Улаанбаатар хотын Ерөнхий менежер бөгөөд Захирагчийн ажлын албаны дарга Г.Батзориг, Газар зохион байгуулалт, геодези, зураг зүйн ерөнхий газрын дарга А.Энхманлай, “Ус сувгийн удирдах газар” ОНӨААТҮГ-ын дарга Ц.Төрхүү тэргүүтэй 87 байгууллагын 111 албан тушаалтан оролцлоо.
Салбарын хэмжээнд 2025-2026 оны өвөлжилтийн бэлтгэл ажилд 68 тэрбум төгрөгийг 8 нэр төрлийн 71888 ажилд зарцуулахаар төлөвлөжээ. Долоодугаар сарын 31-ний өдрийн байдлаар орон нутагт 601, нийслэлд 37875 нийт 38476 ажлын биелэлт хангагдаж, гүйцэтгэл 53.5 хувьтай байна.
ХББОСЯ-ны Нийтийн аж ахуйн бодлого, зохицуулалтын газрын дарга М.Ням-Очир орон нутгийн өмчит,аж ахуйн тооцоот үйлдвэрийн 11 газар, Улаанбаатар хотын хувийн орон сууцны ашиглалтын хоёр компани өвөлжилтийн бэлтгэл ажил нь 30 хувиас доошгүй гүйцэтгэлтэй байгаа талаар танилцуулаад “Дундговь ус” ОНӨААТҮГ 7.4 хувь, Дорноговь аймгийн “Чандмань илч” ОНӨХХК 10.8 хувийн гүйцэтгэлтэй байгаа учраас өвөлжилтийн бэлтгэл ажлыг яаралтай дуусгах талаар холбогдох арга хэмжээг авч хэрэгжүүлэх шаардлагатай гэлээ.
Түүнчлэн шугам сүлжээ, тоног төхөөрөмжийн насжилтийг тодорхойлж, эрсдэлийн үнэлгээ хийн эрэмбэлж, засаж сайжруулах, байгаль, цаг уурын онцгой нөхцөл байдал үүссэн үед аюулгүйн нөөц сэлбэг материалыг бүрдүүлэх, цахилгаан эрчим хүчний тасалдал, хязгаарлалтаас үүдэлтэй хүндрэлтэй нөхцөл байдал үүссэн үед цахилгааны эх үүсвэртэй болох, эсвэл цахилгааны эх үүсвэрийг түрээсээр ашиглах байдлаар зохион байгуулах шаардлагатай талаар онцлов.
Хурлын төгсгөлд ХББОС-ын сайд Э.Бат-Амгалан "Цаг уур орчны шинжилгээний газраас 2025-2026 оны өвөлжилт, хаваржилт хүндрэх эрсдэлтэй байгаа талаар мэдээлснийг онцлоод дээрх 87 байгууллагуудад өвлийн бэлтгэл ажлыг эрчимжүүлж, хурдан шуурхай уялдаа холбоотой ажиллахыг үүрэг болгов. Түүнчлэн орон сууц, нийтийн аж ахуйн салбарынхан төлөвлөсөн бүх ажлаа аравдугаар сарын 20-ны дотор дуусгах ёстой гэдгийг чухалчлав.
