“Монгол хаан” жүжгийн төслийн баг Япон Улсын Токио хотноо 8 сарын 28-ны өдөр хэвлэлийн бага хурал хийж, Японы мэргэжлийн сүмогийн 69 дэх их аварга, Монгол Улсын Хөдөлмөрийн баатар, гавьяат тамирчин М.Даваажаргал “Монгол Хаан” жүжгийн Япон улс дахь соёлын элч төлөөлөгч болсныг албан ёсоор зарлалаа.
Хэвлэлийн бага хуралд жүжгийн ерөнхий найруулагч Б.Баатар, гүйцэтгэх продюсер А.Баярцэцэг, хамтарсан продюсер Э.Санчирболд, Э.Баясал болон “Монгол Хаан” жүжгийн соёлын элч Хакүхо М.Даваажаргал нар оролцов.

Өмнөх жилүүдэд Монгол, Их Британи, Сингапурын дэлхийн тайзнуудад тоглогдож, мэргэжлийн шүүмжлэгчид, үзэгчдээс өндөр үнэлгээ авсан, Монгол Улсын Хөдөлмөрийн баатар, Ардын уран зохиолч, Төрийн шагналт, Соёлын гавьяат зүтгэлтэн, яруу найрагч Бавуугийн Лхагвасүрэнгийн “Тамгагүй Төр” буюу “Монгол хаан” жүжиг нь 124 сая хүн амтай, Азийн тэргүүлэх зах зээл болох Японд амжилттай нэвтэрч, театрын зах зээлд Азийг төлөөлөх амжилттай төсөл болж чадаж байгааг ийнхүү жил бүр батлан харуулж байна.

Түүнчлэн энэ жил Монголын Үндэсний Их Баяр Наадмаар Япон Улсын Цог Жавхлант Эзэн хаан Нарухито, Эрхэм дээд хатан Масака нар Монгол Улсад айлчлах түүхэн жилтэй давхцаж Япон улс даяар Монголоор амьсгалсан цаг мөчийн араас ирэх сард Монголын 70 гаруй шилдэг уран бүтээлчид Япон улсыг зорих гэж буй нь Монгол, Япон хоёр улсын соёлын хамтын ажиллагааны түүхэнд тод мөрөө үлдээх үйл явдал болох нь гарцаагүй.

“Монгол Хаан” жүжгийн тасалбар Японы зах зээл дээр борлогдож байгаа бөгөөд ирэх 10-р сарын 10-20-нд Токио хотноо, 24-26-нд Нагояа хотноо тус толилуулагдах гэж байна.