Голомт банкнаас жил бүр зохион байгуулдаг “Голомт алтны форум-2026”-д энэ сарын 26-ны өдөр болсон бөгөөд Сангийн дэд сайд Б.Хулан тус форумын “Уул уурхайн салбарын санхүүжилт: Боломж, эрсдэл, бодлогын уялдаа” сэдэвт хэлэлцүүлэгт оролцлоо.

Дэд сайд хэлэлцүүлгийн үеэр алтны салбарын татвар, санхүүгийн орчны талаар мэдээлэл өгөхөөс гадна Засгийн газраас 2025 оны 12 дугаар сарын 30-ны өдөр Улсын Их Хуралд өргөн мэдүүлсэн татварын багц хуулийн төслийн хүрээнд тухайн салбарын татвар төлөгчдийн хамрагдаж болох татварын дэмжлэгийн талаар танилцуулсан.

@Тухайлбал,

1.Нэмэгдсэн өртгийн албан татварын тухай хуульд нэмэлт, өөрчлөлт оруулах тухай хуулийн төслийн хүрээнд:

✓ Үндсэн хөрөнгө болох барилга, байгууламжийг 10 жил, тоног төхөөрөмж худалдан авахад төлсөн НӨАТ-ыг 5 жилээр хувь тэнцүүлэн хасагдуулдаг байсныг шууд хасах

✓ Ажилтныг сургах, мэргэшүүлэх, хангамжийн болон ёслол хүндэтгэлийн зардлыг хасах боломжийг олгох

✓ Баримтгүй худалдан авалтыг бэлэн бус гүйлгээнд үндэслэн НӨАТ-ын хасалт хийх

✓ Гадаадаас авсан ажил, үйлчилгээний зардлын НӨАТ-ыг хасагдуулах

2.Аж ахуйн нэгжийн орлогын албан татварын тухай хуульд нэмэлт, өөрчлөлт оруулах тухай хуулийн төслийн хүрээнд:

✓ Татварын ачааллыг бууруулах зорилгоор жилийн 6-10 тэрбум төгрөгийн ашигтай ажилласан аж ахуйн нэгжүүдэд 15%-иар татвар ногдуулах;

✓ Тусгай зөвшөөрөл эзэмшигч нь нэмж хувьцаа гаргаж хувь нийлүүлсэн хөрөнгөө нэмэгдүүлснийг эрх борлуулсан, шилжүүлсэн гэж үзэхгүй байх

✓ Сайн дурын даатгалын хураамжийн дүнг хасагдах зардалд тооцох хэмжээг жил бүр нэмэгдүүлж, 2029 онд 30%-д хүргэх

✓ Ажилтныг сургах, мэргэшүүлэх, ёслол хүндэтгэлийн зардлыг хасагдуулах

✓ Шинээр эзэмшсэн хөрөнгийн элэгдэл, хорогдлын шимтгэлийг тухайн хөрөнгийг ашиглаж эхэлсэн өдрөөс эхлэн тооцох зэрэг болно.