Нийслэлийн Иргэдийн Төлөөлөгчдийн Хурлын даргын захирамжийн дагуу Нийслэлийн гэмт хэргээс урьдчилан сэргийлэх ажлыг зохицуулах салбар зөвлөлөөс хүүхдийг гэмт хэргээс урьдчилан сэргийлэх, үе тэнгийн дээрэлхэлтийн эсрэг ажлын хэсэг байгуулсан билээ. Тус ажлын хэсгийн хуралдаанд НИТХ-ын дарга А.Баяр “Үе тэнгийн дээрэлхэлтийн эсрэг шат дараатай ажлуудыг хийж байна. Эхний ээлжинд сургуулиудад судалгаа хийж хамгийн их үе тэнгийн дээрэлхэлт гардаг 22 сургуультай хамтарч ажиллахаар болсон. Сургуулийн удирдлагуудын зүгээс ч эцэг эх, асран хамгаалагчдад нь хариуцлага тооцдог болох хэрэгтэй гэдгийг хэлж байна. Мөн үе тэнгийн дээрэлхэлтийг удаа дараа үйлдэж буй сурагчийн хувийн хэрэгт энэ талаар нь тэмдэглэж үлдээдэг ч юм уу зарим арга хэмжээг зайлшгүй авах шаардлага байна. Улмаар их, дээд сургуульд орох, гадаадын сургуульд элсэхэд нь булли буюу үе тэнгийн дээрхэлхэлт, хүчирхийллийг удаа дараа хийж байсан тодорхойлолтыг хардаг. Гадны улс орнууд ч буллидэлтэй ингэж тэмцээд эхэлсэн. Энэ талаар их, дээд сургуулиудтай уулзана. Бид ингэж хатуу хариуцлага тооцдог болж байж л үе тэнгийн дээрэлхэлтийг багасгаж чадна” хэмээн онцолсон юм.

Учир нь тус ажлын хэсгийн хуралдаанд нийслэлийн 8 дүүргийн ЕБ-ын 22 сургуулиас авсан судалгааны үр дүнг танилцуулсан бөгөөд сургуулийн удирдлага, нийгмийн ажилтан, сэтгэл зүйч нар оролцож шалтгаан, хор уршиг, нөлөөллийн талаар ярилцсан. Судалгаанд нийслэлийн 8 дүүргийн 22 сургуулийн 8-10-р ангийн 1093 сурагч, 213 эцэг, эх, асран хамгаалагч хамрагдсан бөгөөд нийт сурагчдын 71.9% нь үе дээрэлхэлтийн талаар мэднэ, тодорхой хэмжээний ойлголттой гэж хариулсан байна. Үе тэнгийн дээрэлхэлтийг дүүргээр авч үзвэл Багахангай дүүрэг 35.7%, Хан-Уул дүүрэг 33.1%, Баянзүрх дүүрэг 30.6%, Налайх дүүрэг 25%, Баянгол дүүрэг 22.9%, Сүхбаатар дүүрэг 20.9%, Чингэлтэй дүүрэг 17.2%, Сонгинохайрхан дүүрэг 15.2% эзэлж байна. Товчхондоо Багахангай, Хан-Уул дүүргийн 3 сурагч тутмын 1 нь үе дээрэлхэлтэд өртдөг гэсэн дүн гарчээ. Үе тэнгийн дээрэлхэлтэд өртсөн сурагчдаас давтамжийг тодруулахад сурагчдын гуравны хоёр нь 3 хүртэлх удаа гэж хариулжээ. Харин 22 сурагч буюу судалгаанд хамрагдсан 1093 сурагчийн 2% нь 10 болон түүнээс дээш удаа, тодруулбал байнга үе тэнгийн дээрэлхэлтэд өртдөг байна.

Харин үе тэнгийн дээрэлхэлтэд өртсөн сурагчид хэнд хандахаа төдийлөн мэддэггүй бөгөөд 44.5% нь интернэтээс хайдаг, 19.7% нь сургуулийнхаа нийгмийн ажилтанд ханддаг, 17.3% гэр бүлдээ ханддаг, 11.8% нь багшдаа ханддаг, 3.4% найз, нөхдөдөө, 2.9% нь цагдаад ханддаг гэсэн байна. Үүнээс харахад үе тэнгийн дээрэлхэлт даамжрах, нуугдмал байдлаар хүрээгээ тэлэх нөхцөл бүрддэг байна. Үе тэнгийн дээрэлхэлт бусдыг доромжлох, цуурхал тараах, бүлгээс гадгах буюу тусгаарлах, заналхийлэх, биед халдах гэсэн зонхилох хэлбэрүүдээр илрэх бөгөөд дээрх судалгаанд хамрагдсан хүүхдүүдийн 22.1% нь цахим дээрэлхэлтэд өртсөн байна. Ингэхдээ Хан-Уул дүүргийн цахим дээрэлхэлтийн хувь 35.5% байна.

Иймд эцэг эх, асран хамгаалагчдад хариуцлага тооцдог байх зэрэг сургууль бүр тухайлсан саналаа нэгтгэж, хөтөлбөр боловсруулах ажил явж байна.