Энэ оны Дэлхийн нүүдэлчдийн наадмын албан ёсны бэлгэдэл амьтнаар цоохор ирвэсийг сонгосон тухай тус наадмын Олон улсын нарийн бичгийн дарга нарын газраас мэдэгджээ.

Дэлхийн нүүдэлчдийн VI наадмыг Киргиз улсад зохион байгуулна. Наадмын үеэр спортын тэмцээн уралдаанаас гадна, соёлын үйл ажиллагаа, эрдэм шинжилгээний хурлууд болно.

Цоохор ирвэсийг сонгосон нь санамсаргүй хэрэг биш бөгөөд энэхүү амьтны дүр төрх нь тус улсын байгаль, газар нутаг, соёлтой салшгүй холбоотой юм. Наадмын бэлгэдэл нь хүч чадал, дэлхий ертөнцөд нээлттэй байх болон уламжлалаа дээдлэх үзэл санааг илэрхийлж буйг нарийн бичгийн дарга нарын газраас онцолсон байна. Энэхүү дүр төрхийг мэдээлэл болон сурталчилгааны бүтээлүүдэд идэвхтэй ашиглах аж.

Нүүдэлчдийн наадам бол нүүдэлчин ард түмний уламжлалт спорт, соёлын өвийг хадгалан хамгаалах, сурталчлах зорилгоор 2014 онд Киргиз улсын санаачилгаар эхлүүлсэн олон улсын соёл, спортын төсөл юм. Энэ удаагийн наадам наймдугаар сарын 31-нээс есдүгээр сарын 6-ны хооронд болно. Наадмын нээлт Бишкек хотын "Бишкек Арена" цэнгэлдэх хүрээлэнд болох бөгөөд тус улсын Тусгаар тогтнолын өдөртэй давхцаж байгаагаараа онцлог юм.

Гол үйл ажиллагаануудыг Иссык-Куль мужид явуулахаар төлөвлөсөн байна. Наадамд 100 гаруй орны 3000 гаруй тамирчин оролцох төлөвтэй байгаа бөгөөд хөтөлбөрт нүүдэлчдийн уламжлал, соёл, ахуй амьдралаас үүсэлтэй уламжлалт спортын 43 төрөл, соёл, эрдэм шинжилгээний үйл ажиллагаанууд багтжээ.

Ташрамд дурдахад, Киргиз улсад "Дэлхийн нүүдэлчдийн наадмын оюун санааны болон зохицуулах төв" гэсэн статус олгохыг хуульчлан баталгаажуулах саналыг дэвшүүлээд байгаа юм. Холбогдох хуулийн төслийг тус улсын Соёл, мэдээлэл, спорт, залуучуудын бодлогын яам боловсруулж, олон нийтийн хэлэлцүүлэгт оруулаад байна.

Мөн Казахстаны Кокпарын холбооны ерөнхийлөгч Айдарбек Хожаназаров казах түмний "кокпар" буюу тулам булаалдах наадгай VI наадмын хөтөлбөрт албан ёсоор багтсан гэдгийг мэдэгджээ.

Эх сурвалж: montsame.mn