Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2026.04.10) Иргэний нисэхийн ерөнхий газарт ажиллаж, Олон улсын иргэний нисэхийн байгууллага (ICAO)-аас хийх аюулгүй байдлын шалгалтын бэлтгэл ажил, иргэний нисэхийн салбарт хэрэгжиж буй бодлого, шийдвэрүүдийн ажлын явцтай биечлэн танилцлаа.
Энэ ажлын хүрээнд салбарын сайд Хан-Уул дүүрэгт байрлах, 15 жилийн турш гацсан “цэнхэр барилга” буюу Иргэний нисэхийн үндэсний төв (ИНҮТ)-ийн Бүсийн нислэгийн хөдөлгөөний удирдлагын төвийн барилгын ажлын явцтай танилцаж, гүйцэтгэгч “Боёд констракшн” ХХК-ийн удирдлага, инженер техникийн ажилтнуудтай уулзлаа.
Тэрээр барилгын ажлын гүйцэтгэл удаашралтай байгааг шүүмжилж, ажлыг эрчимжүүлж, шаардлагатай тохиолдолд 24 цагаар ажиллан барилгын ажлыг цаг хугацаанд нь ашиглалтад оруулах үүрэг даалгаврыг өглөө.
Мөн захиалагчийн хяналтыг сайжруулж, барилгын ажлыг гүйцэтгэж буй компанийн барилгын ажлын явцад өдөр тутмын хяналт тавьж ажиллах, тулгамдсан асуудлыг газар дээр нь шуурхай шийдвэрлэж, барилгын ажлыг чанартай, хариуцлагатай урагшлуулахыг холбогдох албаныханд анхаарууллаа.
ИНҮТ нь Монгол Улсын агаарын орон зайд үйлдэгдэж буй бүх нислэгийг хянаж, удирддаг бөгөөд агаарын орон зайгаар дамжин өнгөрөх нислэгийн тоо жил ирэх тусам нэмэгдэж байгаагаас үүдэн Бүсийн нислэгийн хөдөлгөөний удирдлагын төвийн барилгын ажлыг анх 2011 онд эхлүүлсэн байдаг. Гэвч гүйцэтгэгч компаниуд солигдож, санхүүжилт болон зохион байгуулалтын асуудлаас шалтгаалан барилгын ажил 15 жил царцсан байна.
2025 оны 12 сарын 05-нд Төрийн худалдан авах ажиллагааны газраас барилгын дуусгал ажлын тендерийг дахин зарлаж, “Боёд констракшн” ХХК шалгарсан байна.
Зам, тээврийн сайд Б.Дэлгэрсайхны зүгээс барилгын ажлын явцтай танилцаж, дээвэр муудсан, цахилгаан татах техникийн нөхцөл байдал тодорхойгүй, газар доорх кабелийн трасс шийдэгдээгүй, дотор болон гадна талын ажлууд дутуу зэрэг олон зөрчил дутагдал байгааг онцолж, цаг хугацаа алдсан ажлуудыг яаралтай нөхөн гүйцэтгэхийг үүрэг болголоо.
Түүнчлэн салбарын сайд 2026 оны тавдугаар сарын 10-нд дахин ирж, барилгын ажлын явцтай танилцах бөгөөд шаардлага хангахгүй тохиолдолд тендерийг цуцлах хүртэл арга хэмжээ авна гэдгийг хатуу анхаарууллаа.
