Зам, тээврийн сайд Б.Дэлгэрсайхан өнөөдөр (2026.04.10) Иргэний нисэхийн ерөнхий газарт ажиллаж, Олон улсын иргэний нисэхийн байгууллага (ICAO)-аас хийх аюулгүй байдлын аудитын шалгалтын бэлтгэл ажилтай танилцаж, салбарын удирдлага, алба хаагчидтай уулзаж санал солилцлоо.
ICAO нь гишүүн орнуудын иргэний нисэхийн аюулгүй байдлын хяналт, зохицуулалтын тогтолцоонд байнгын хяналтын аргачлалын хүрээнд аудит хийж, дэлхийн нисэхийн аюулгүй байдлыг баталгаажуулдаг, олон улсын байгууллага юм. Манай улс энэхүү бүрэн хэмжээний ээлжит аудитын шалгалтад 16 жилийн дараа дахин хамрагдах гэж байна. Тодруулбал, ICAO-ын аудит шалгалт Монгол Улсад 2026 оны дөрөвдүгээр сарын 22-ноос тавдугаар сарын 7-ны өдрүүдэд зохион байгуулагдах юм.
Бэлтгэл ажлын хүрээнд Зам, тээврийн яам, Иргэний нисэхийн ерөнхий газар, Иргэний нисэхийн үндэсний төв зэрэг байгууллагууд "Ажлын хэсэг" байгуулан хамтран ажиллаж, бэлтгэл хангаж байна.
Энэхүү уулзалтаар ICAO-гийн аудитын хүрээнд Чикагогийн конвенцын хэрэгжилт, үндэсний хууль, дүрэм журмын мөрдөлт, аюулгүй байдлын хяналт, хүний нөөц, сургалт зэрэг асуудлаар аудитад шалгуулах нийт 836 асуултад дотооддоо үнэлгээ, зөвлөмж өгч ажиллаж буйг танилцууллаа. Одоогийн байдлаар дотоод аудитын дундаж үнэлгээ 70.5 хувь, бэлтгэл ажлын хэрэгжилт 89.15 хувьтай байгааг албаныхан мэдээллээ.
Монгол Улс өнөөдрийн байдлаар олон улсын 32, орон нутгийн 8 чиглэлд нислэг үйлдэж байгаа бөгөөд 2025 оны байдлаар 27,580 хөөрөлт, буулт, 81,086 дамжин өнгөрөх нислэг бүртгэгджээ. 2010-2026 онд иргэний нисэхийн салбарын ачаалал 2.1 дахин өссөн үзүүлэлттэй байна.
Ази, Номхон далайн бүсийн орнуудын аудитын дундаж үнэлгээ 66.6 хувь, дэлхийн дундаж 69.6 хувь байдаг бол Монгол Улс энэ удаагийн аудитад бүсийн дунджаас дээгүүр үнэлгээ авах зорилт тавин ажиллаж байгааг албаныхан онцолж байлаа.
Монгол Улс 2010 онд ICAO-ийн "USOAP-CMA" бүрэн хэмжээний аудитын шалгалтад хамрагдаж, 86.45 хувийн үнэлгээг авч байсан түүхтэй. Мөн 2017 онд 2010 оны аудитын давтан үнэлгээнд хамрагдаж 88.39 хувийн үнэлгээг авч байсан туршлагатай. 2026 онд буюу 16 жилийн дараа ICAO-ийн USOAP-CMA бүрэн хэмжээний аудитын шалгалтад дахин хамрагдах гэж байгаа нь энэ юм.
Зам, тээврийн сайд Б.Дэлгэрсайхан (ICAO)-аас хийх шалгалтын бэлтгэл ажлын явцтай танилцаж, удаашралтай байгаа ажлуудыг эрчимжүүлэх, хууль, дүрэм журмын хэрэгжилтийг сайжруулах, нислэгийн аюулгүй байдлыг хангах тогтолцоог олон улсын шаардлагад нийцүүлэх чиглэлд анхаарч ажиллахыг иргэний нисэхийн салбарын удирдлагууд, ажлын хэсгийнхэнд үүрэг болголоо.
Мөн салбарын хүний нөөцийн чадавхыг бэхжүүлэх, мэргэжилтнүүдийн сургалт, дадлагыг тогтмол сайжруулах, байгууллагуудын уялдаа холбоог нэмэгдүүлэх, иргэний нисэхийн салбарын алба хаагч бүр идэвх санаачлагатай, хичээл зүтгэлтэй ажиллах шаардлагатайг онцлон тэмдэглэлээ.
