Боловсролын яам “ЖАЙКА” олон улсын байгууллагатай хамтран “Монгол Улсын ерөнхий боловсролын сургуулийн үдийн хоол үйлдвэрлэлийг дэмжих төсөл”-ийг 2021-2025 онд нийслэл, Дундговь, Өвөрхангай аймгуудад хэрэгжүүлсэн.

Төслийн үр дүнд:

• Сургуулийн хоол үйлдвэрлэл, үйлчилгээнд шим тэжээлийн тэнцвэртэй цэсийг өнгөний системтэй уялдуулан нэвтрүүлсэн.

• Цэцэрлэг, сургуулийн хүнсний хангамжийн тогтолцоог сайжруулах, орон нутгийн хүнс үйлдвэрлэгч жижиг, дунд үйлдвэрлэл, хоршоодын үйл ажиллагааг дэмжих зорилгоор төслийн хүрээнд анх ерөнхий гэрээний аргаар худалдан авах ажиллагаа орон нутагт зохион байгуулсан.

• Дундговь аймагт эхлүүлсэн сүү хөтөлбөр нь “Өдөр бүр нэг аяга сүү хөтөлбөр”-ийн эхлэлийг тавьсан.

• Хүний нөөцийг бэлтгэх, чадавхжуулах чиглэлээр нийслэл болон орон нутагт оролцогч талуудад зориулсан сургалт мэдээллийн ажлыг үе шаттайгаар зохион байгуулсан.

• Орон нутгийн хамтын ажиллагааг бэхжүүлэх хүрээнд Хүүхдийн хоолны зөвлөлийг байгуулсан.

Дараагийн шатны төслийг хэрэгжүүлэх саналыг уламжилж, хамтран ажилласны үр дүнд энэхүү төсөл албан ёсоор батлагдаж “Жайка” олон улсын байгууллагаас нарийвчилсан судалгааны багтай уулзалт хийлээ.

Энэ удаагийн төслөөр сургууль дундын хоол үйлдвэрлэл, үйлчилгээний газрын зохион байгуулалт, төлөвлөлт, хүний нөөцийн удирдлага, хүнсний ханган нийлүүлэлт, түгээлт зэргийг оновчлох, түүнд орон нутгийн оролцоо хамтын ажиллагааг хэрхэн хангаж болох талаар “Загвар гал тогоог” Дархан-Уул аймагт бий болгох юм.

Төслийн баг энэ оны 04 дүгээр сарын 13-наас 05 дугаар сарын 01-ний хооронд ажиллаж техникийн хамтын ажиллагааны төслийн үндсэн нөхцөл байдал, агуулга, төслийн хамрах хүрээг нарийвчлан тодорхойлж, хамтран хэрэгжүүлэгч байгууллагуудтай уулзах санах солилцож, төслийн загвар матриц, үйл ажиллагааны төлөвлөгөөг эцэслэн батална.