Хууль зүй, дотоод хэргийн дэд сайд Д.Мөнх-Эрдэнэ “Монгол Улсын шүүх эрх мэдлийн шинэтгэлийг үр дүнтэй хэрэгжүүлэх нь” төслийн хүрээнд хүрэлцэн ирсэн ХБНГУ-ын Эссэн хотын анхан шатны шүүхийн Ерөнхий шүүгч асан Карл-Хаинц Волески, шүүхийн Тамгын газрын дарга Катя Брухштайнер, Хосолсон түншлэл төслийн суурин зөвлөх Кристоф Копецки нарыг хүлээн авч уулзлаа.
ХЗДХЯ-ны мэдээлснээр, уулзалтад Шүүхийн ерөнхий зөвлөлийн гишүүн Х.Эрдэм-Ундрах, Хууль зүй, дотоод хэргийн яамны Олон улсын гэрээ, гадаад хамтын ажиллагааны газрын дарга Ч.Нарантуяа, Хууль зүйн бодлогын газрын Хувийн эрх зүйн хэлтсийн дарга О.Оюунзул болон албаны бусад төлөөлөл оролцов.
Уулзалтаар Иргэний хэрэг шүүхэд хянан шийдвэрлэх тухай хуульд заасан тусгайлсан журмаар хэрэг хянан шийдвэрлэх журмыг боловсронгуй болгох ажлын явцын талаар санал солилцов. Мөн ХБНГУ-ын Иргэний процессын хуульд заасан “Төлбөрийн захирамж гаргах журам”-ын туршлагатай танилцаж, дээрх зохицуулалтыг Монгол Улсын Иргэний хэрэг шүүхэд хянан шийдвэрлэх тухай хуульд тусгах боломж, хэрэгцээ, нөхцөлийн талаар талууд ярилцлаа.
“Төлбөрийн захирамж гаргах журам” нь эрх зүйн маргаангүй мөнгөн хөрөнгө гаргуулах нэхэмжлэлд хариуцагч хуульд заасан хугацаанд эсэргүүцэл гаргаагүй тохиолдолд шүүх хуралдаан явуулахгүйгээр шийдвэр гаргах, улмаар гүйцэтгэх баримт бичиг олгох боломж бүрдүүлдгээрээ онцлогтой.
Энэ нь хэрэг хянан шийдвэрлэх ажиллагааны өмнөх шатанд нэг төрлийн “шүүлтүүр” болж, шүүхийн ачааллыг бууруулах, хэрэг, маргааныг шийдвэрлэх хугацааг хурдасгах, иргэн, хуулийн этгээдийн мөнгөн төлбөрийг шуурхай гаргуулах бодит үр нөлөөтэйг онцлов.
Мөн Хууль зүй, дотоод хэргийн дэд сайд Д.Мөнх-Эрдэнэ Монгол Улс Ром-Германы эрх зүйн бүлд хамаардаг тул иргэний хэрэг шүүхэд хянан шийдвэрлэх эрх зүйн орчныг боловсронгуй болгохдоо Европын орнууд, тэр дундаа Герман, Австрийн эрх зүйн хөгжил, шүүхийн практикийг судлах нь чухал болохыг дурдаад, эдгээр улсын Иргэний процессын хуулийн “Төлбөрийн захирамж гаргах журам”-ын зохицуулалтыг үндэсний хууль тогтоомжид нутагшуулах боломжийг цаашид судалж, хамтран ажиллахаа илэрхийллээ.
“Монгол Улсын шүүх эрх мэдлийн шинэтгэлийг үр дүнтэй хэрэгжүүлэх нь” хосолмол түншлэлийн төслийг манай улсад Европын холбооны санхүүжилттэй Монгол Улсын шүүх эрх мэдлийн байгууллагууд болон Германы Олон улсын эрх зүйн хамтын ажиллагааны сантай хамтран хэрэгжүүлж буй юм.
Эх сурвалж: Montsame.mn
