Завхан аймагт “Шинжлэх ухаанч-Хариуцлагатай мал эмнэлэг” зорилтот жилийн хүрээнд мал эмнэлгийн салбарын зөвлөгөөн зохион байгууллаа.

Зөвлөгөөнд аймгийн Мал эмнэлгийн газар, Мал эмнэлгийн холбоо, сумдын мал эмнэлгийн тасгийн улсын байцаагч, эмч, тархвар зүйчид оролцов. Нээлтийн үеэр аймгийн Засаг дарга Г.Өнөрбаяр мал аж ахуй, мал эмнэлгийн салбарт баримталж буй бодлого, төлөвлөлтийг танилцуулж, оролцогчидтой санал солилцлоо.

Хэлэлцүүлгийн үеэр бэлчээрийн доройтлыг бууруулах, мал сүргийг эрүүлжүүлэх, чанартай тарилга, туулгад бүрэн хамруулах, мал эмнэлгийн үйлчилгээний үнэ тарифыг шинэчлэх, техник, тоног төхөөрөмжийн шинэчлэл хийх зэрэг асуудлыг хөндөн ярилцав.

Завхан аймаг мал аж ахуйг эдийн засгийн тэргүүлэх салбар болгон хөгжүүлэх бодлогын хүрээнд малын гоц халдварт өвчнөөс урьдчилан сэргийлэх, эрүүлжүүлэх, мал сүргийн бүтцийг сайжруулахад анхаарч байна. Аймгийн Мал эмнэлгийн газар нь мал, амьтны өвчнөөс урьдчилан сэргийлэх, тэмцэх, эрүүлжүүлэх, малын гаралтай түүхий эд, бүтээгдэхүүний аюулгүй байдлыг ханган ажиллаж байгаа бол Хүнс, хөдөө аж ахуйн газар нь мал үржил, үйлдвэрлэл, худалдаа, үйлчилгээний бодлогыг тодорхойлж байна.

Оролцогчид бэлчээрийн менежментийг сайжруулах, малын тоо толгойг бэлчээрийн даацад нийцүүлэх, ус, хадлан, ой, цаг уурын өөрчлөлтөд дасан зохицох чиглэлээр санал, шийдэл дэвшүүлэв. Түүнчлэн малын тоо толгойг нэмэгдүүлэхээс илүүтэй үүлдэр угсааг сайжруулж, чанарт анхаарах, бэлчээрийн даацад тохируулан мал аж ахуй эрхлэх шаардлагатайг онцоллоо.

Мөн уур амьсгалын өөрчлөлтөд дасан зохицсон бэлчээр ашиглалт, байгалийн нөөцийн даацад нийцсэн, ашиг шим өндөр мал сүргийг өсгөх, ингэхдээ малын эрүүл мэндийг чухалчлан авч үзэх нь чухал байгааг дурдав.

Ингэснээр эрүүл малын гаралтай түүхий эд, бүтээгдэхүүний үнэ цэнийг нэмэгдүүлэх, үндэсний болон олон улсын стандарт шаардлагад нийцүүлэхэд төр, хувийн хэвшил, малчдын хамтын ажиллагааг бэхжүүлэх шаардлагатайг онцлон ярилаа гэж аймгийн Хүнс, хөдөө аж ахуйн газраас мэдээллээ.

Завхан аймгийн Засаг дарга Г.Өнөрбаяр

Эх сурвалж: Montsame.mn