Сурагч нэг бүрийн түвшинг тогтоох, сургалтын чанарыг ахиулах зорилготой “Анги нийтийн сорил”-д Увс аймгийн ерөнхий боловсролын сургуулиудын 3-9 дүгээр ангийн нийт 12750 сурагч хамрагдлаа. Сорилыг Увс аймгийн Засаг даргын 2025-2028 оны “Увсын хөгжил” үйл ажиллагааны хөтөлбөр болон “Дэлхийн иргэн” боловсролын төслийн хүрээнд зохион байгуулсан байна.
Сорилыг аймгийн хэмжээнд үйл ажиллагаа явуулж буй ерөнхий боловсролын 30 сургуулийн хүрээнд урьдчилан бэлтгэсэн шалгалтын 35 цэгт төвлөрүүлэн зохион байгуулжээ. Зохион байгуулалтыг аймгийн ЗДТГ-ын Нийгмийн бодлогын хэлтэс, Боловсролын газар, сум орон нутгийн удирдлага, сургуулиудын сургалтын менежер, нийгмийн ажилтнуудын бүрэлдэхүүнтэй нийт 70 гаруй хүний хамтарсан баг нэгдсэн төлөвлөгөө, хуваарийн дагуу дөрөвдүгээр сарын 30-ны өдөр хэрэгжүүлжээ.
Энэхүү сорилыг Боловсролын үнэлгээний төвийн дэмжлэгтэйгээр олон улсын сургалтын хөтөлбөрийн үнэлгээний аргачлалд нийцүүлэн боловсруулж, хэрэглээнд суурилсан мэдлэг, бүтээлч сэтгэлгээ, чадварыг үнэлэх даалгавар бүхий ажлын дэвтэр ашиглан зохион байгуулснаараа онцлог болжээ.
Бага ангийн түвшинд монгол хэл, математик болон нэгдмэл агуулгаар, дунд ангийн түвшинд судлагдахууныг багцлан авчээ. Тодруулбал, 6 дугаар ангид математик, мэдээллийн технологи, 7 дугаар ангид байгалийн ухаан, 8 дугаар ангид нийгмийн ухаан, 9 дүгээр ангид гадаад хэл гэсэн нийт 7 чиглэлээр “Анги нийтийн сорил”-ыг зохион байгуулсан байна.
Сорилд хамрагдсанаар орон нутгийн сурагчдыг олон улсын жишигт нийцсэн үнэлгээний аргачлалаар үнэлж, тэдний түвшнийг тодорхойлох боломж бүрдэж байна. Мөн багш нар хэрэглээнд суурилсан даалгавар боловсруулах арга зүйд суралцахын зэрэгцээ ерөнхий боловсролын сургуулиудын гүйцэтгэлийн үнэлгээг олон улсын жишигт хүргэхэд чухал ач холбогдолтой байна.
Эх сурвалж: Montsame.mn
