Зарим мөч хүний амьдралд чимээгүйхэн ирээд, санаа бодлыг бүхэлд нь өөрчилчихдөг. Миний хувьд тийм мөч нэгэн аяллын замд тохиолдсон юм.

Оюутан ахуйдаа англи хэлээ сайжруулах зорилгоор жуулчдад аяллын хөтөч хийдэг байлаа. Хэлээ сайжруулах хүсэлтэй залуу хүнд энэ ажил боломж, туршлага, бас орлого олох хэрэгцээ байв. Ирсэн зочдод үзэсгэлэнт байгаль, нүүдэлчин ахуй, хот хөдөөгийн ялгаа, монгол хүний зан чанарын тухай ярьж өгнө. Хаа очиж орон нутгийн хүүхэд болохоор монгол ахуйгаа ч сайн мэднэ. Аяллын туршид яриа хөөрөөтэй өнждөг, асуусанд нь подхийтэл хариулчихдаг, өөрийгөө боломжийн л хөтөч гэж боддог байв.

2023 оны 7-р сард Тайваниас ирсэн 2 жуулчны хамт Дундговь аймгийн Адаацаг, Дэлгэрцогт сумын нутагт орших Бага газрын чулууг зорилоо. Зам урт, яриа тасрахгүй элдвийг хөөрөлдсөөр…

Аяллын эхэнд замдаа таарах газар ус, нутгийн онцлог, монголын түүхийн талаар мэддэг бүхнээ тайлбарлан ярьж явлаа. Яриаг минь сонсож байсан хоёр жуулчин маань монголын түүхийн талаар нэлээд мэдлэгтэй бололтой, аяллын туршид “миний мэдэхгүй монгол”-ыг ярьж эхэлсэн. Хаадын үе, төрийн уламжлал, соёлын өв, миний сонсоогүй эх сурвалж, баримтуудыг хүртэл мэдэж байв. Эх орны минь түүхийг надаас илүү мэдээд байхаар хотны мануухайг хээрийн шувуу тоншоод байгаа юм шиг хачин эвгүй мэдрэмж төрдөг юм билээ.

Хөтөч гэдэг гагц зам зааж, газар танилцуулах бус улсаа төлөөлдөг хүндтэй алба гэдгийг ой тоондоо шингэтэл ойлгосон юм.

Жуулчид Монголд ирээд зөвхөн уул ус, тал хээрийг хардаггүй. Тэд биднийг хардаг. Бидний ярианаас Монголыг сонсож, бидний мэдлэгээр Монголыг хэмждэг.
Тэр аяллаас хойш би сурах бичгээс цаадах Монголыг танихыг хүссэн. Бид чинь сурах бичгийн хэдэн хуудсаар хэмжиж боломгүй их өв, түүх соёлтойг ухаарч ойлгосон. Бидний түүх бол өнгөрсөн цагийн тоосонд дарагдсан зүйл биш, өнөөдөр ч биднийг тодорхойлж буй үнэт зүйл билээ.

Бага газрын чулууг зорьсон тэр аялал надад нэг л зүйлийг үлдээсэн. Би жуулчдад Монголыг үзүүлэхээр явсан ч үнэндээ өөрөө Монголоо таньж эхэлсэн байжээ.

Европын Холбооноос Монгол Улсад суугаа Төлөөлөгчийн газрын дадлагажигч З.Энхсолонго

Эх сурвалж: Montsame.mn