Монгол үндэсний утга соёлын нандин өв болсон монгол бичгийг хойч үедээ өвлүүлэх, түгээн дэлгэрүүлэх иргэд олон нийтийн монгол бичгээ сурч эзэмшиг сонирхлыг дэмжих, шилдэг уран бичээчдийг шалгаруулах, нийтэд сурталчлах, үндэсний бичгээ сэргээн хэрэглэх төрийн бодлогын хэрэгжилтийг хангахад чиглэсэн Жаахан шаргын нутаг олон улсын уралдааны шилдгүүд шалгарлаа.

Зургаа дахь жилдээ зохион байгуулагдаж буй ээлжит наадмыг Дорнын их яруу найрагч Данзангийн Нямсүрэнгийн нэрэмжит болгон зохион байгуулснаараа онцлог юм.

Титэм арт академийн санаачлагаар анх удаа зохион байгуулагдаж байсан уралдаан зургаан жил тасралтгүй үргэлжилж, монгол туургатнуудын наадам болтлоо өргөжжээ. Энэ жил их найрагчийн нэрэмжит болж буй нь үнэхээр онцгой байна. Анхны болоод зургаа дахь жилийн уралдааныг харьцуулахад асар их ялгаа, ахиц дэвшил харагдаж байна. Бүтээлүүдийн чанар чансаа, оролцогчдын сэтгэлгээ, идэвх чармайлт нь маш өндөр түвшинд хүрсэн байна. 100 гаруй бүтээлийг нэг бүрчлэн үзэж, шүүн тунгаах хүндхэн байсан ч үнэхээр чансаатай бүтээлүүд шалгарч ирсэн гэдэгт итгэлтэй байна гэдгийг Титэм арт академийн тэргүүн шүүгч Э.Ариунболд нээлтийн үгэндээ онцоллоо.

Энэ жилийн уралдаанд ОХУ-ын Улаан-Үүд хотоос гурван зочин, Өмнөговь, Архангай, Дорнод, Хэнтий, Сүхбаатар аймгаас нийт 532 хүн оролцож, 110 бүтээлээ ирүүлжээ. Харин шүүгчээр МУСГЗ, Монцамэ агентлагийн Хүмүүн бичиг сонины эрхлэгч Б.Элбэгзаяа, МУГБ Ш.Чулуунбор, МУГЖ, бүжиг дэглээч найруулагч Л.Ганчимэг, Монголын зохиомжит уран бичлэгийн холбооны ТУЗ-ын дарга Э.Аззаяа, МУСТА уран бичээч Ц.Бямбажав нар ажилласан юм.

Их зохиолч Д.Нямсүрэн агсны охин Н.Цасанчихэр “Багш, сурагчдын хийсэн бүтээл бүрээс аавыгаа харж, уулзсан мэт мэдрэмжийг авлаа. Үнэхээр сайхан байна. Зохион байгуулалт сайтай, бүтээл бүрээс нь ур чадвар ханхалсан том наадам болдог юм байна” хэмээн сэтгэгдлээ хуваалцав.

Уралдааныг ЕБС-ийн сурагчид ба насанд хүрэгчид гэсэн хоёр ангиллаар үзгийн, бийрийн бичлэг, хулсан үзэг, эвхмэл бичиг, перформанс гэсэн таван төрлөөр зохион байгуулж, төрөл тус бүрт эхний гурван байрыг шалгарууллаа.

Баруун-Урт сумын Нэгдүгээр сургуулийн багш М.Бүжмаа хулсан бичгийн төрөлд дэд, угалзан эвхмэл бичгийн төрөлд тэргүүн байрт шалгарав. Түүний хувьд энэхүү уралдаанд дөрөв дэх жилдээ оролцож, тэргүүн байрын шагналыг хоёр дахь удаагаа хүртэж байна. Тэрбээр хэлэхдээ, бүтээл тус бүрт нэг нэг өдрийг зарцуулсан, шавь нар маань ч тусалсан. Ерөнхий утга, санаагаа олчих юм бол яг бичихэд хугацаа нэг их ордоггүй. Эвхмэл бичгийн төрөлд Д.Нямсүрэнгийн Дөрвөн цаг шүлгийн Намар хэсгээс үгийн тоогоо тэнцүүлж тав таван үгстэй хэсгүүдээс сонгож бичсэн. Харин хулсан үзгийн бүтээлдээ Үзэсгэлэнт хасарваань мод цэцэглэх цагаар гэх хүн бүрийн сэтгэлд хоногшсон алдартай шүлгийг нь сонгосон. Ер нь энэхүү уралдаанд оролцсноор багш, сурагчдын мэдлэг, ур чадвар маш ихээр дээшилж, бусдаасаа суралцаж илүү шинэ шинэлэг санаануудыг олж хардаг. Миний хувьд ч гэсэн өөрийгөө хөгжүүлж, жилээс жилд бүтээлээ чанаржуулж байгаадаа баяртай байна гэсэн юм.

Энэхүү наадмыг Баруун-Урт сумын Засаг даргын Тамгын газар, Титэм арт академ, Соёл, урлаг, аялал жуулчлал, залуучуудын газар, Нийтийн номын сан зэрэг байгууллагууд хамтран зохион байгуулдаг уламжлалтай.

Эх сурвалж: Montsame.mn