Жаахан шаргын нутаг олон улсын уралдааны гол онцлог болох перформанс арт каллиграф буюу үйлдлийн зохиомжит уран бичлэгийн төрлийн уралдаан хоёр дахь жилдээ зохион байгуулагдлаа. Энэхүү төрөлд найман баг оролцож, бүтээлээ туурвисан нь олны анхаарлыг хамгийн ихээр татав.
Тодруулбал, монгол бичгийг дуу, хөгжим, бүжигтэй хослуулан бүтээл туурвих энэхүү төрөл нь Монгол Улсад дэлгэрээд удаагүй ч маш богино хугацаанд олонд танигдаж буй монгол бичгийн урлагийн өвөрмөц төрөл юм.
Миний хувьд энэхүү уралдааны шүүгчээр хоёр дахь жилдээ ажиллаж байна. Эндээс маш их зүйлийг олж харж, бас суралцаад буцдаг. Гэхдээ хөгжим, дуу, бүжгийн хослолоор монгол бичгийнхээ гайхамшгигй илэрхийлдэг ийм цоо шинэ төрөл гарч ирж байгаад онцгойлон баяр хүргэмээр байна. Монгол Улсад дэлгэрээд удаагүй энэ төрөл эх орны минь наран мандах нутагт түгэн дэлгэрч, багш сурагчид үнэхээр онцгой бүтээлүүдийг гаргаж байгааг харах бахархам байна. Перформанс буюу монгол бичгийг үйлдлийн урлагтай хослуулсан энэ төрөл бол Жаахан шаргын нутаг наадмын гол онцлог нь гэж тодорхойлж болно гэдгийг МУСГЗ, Хүмүүн бичиг сонины эрхлэгч Б.Элбэгзаяа онцоллоо.
Зөвхөн энэ төрөлд оролцох гэж нийслэлийн 34, 184 дүгээр сургуулийн багш сурагчид зорин иржээ. Мөн Баруун-Урт, Онгон сумын ЕБС-ийн багууд бүтээлээрээ өрсөлдснөөс нийслэлийн 184 дүгээр сургуулийн баг Босоо монгол үзүүлбэрээрээ гран при шагналыг хүртэж, Япон улсаар аялах эрхийн эзэд боллоо. Удаах байранд Баруун-Урт сумын нэг, гуравдугаар сургуулийн багш сурагчдын багш шалгарсан юм.
Эх сурвалж: Montsame.mn
