Тэрбум мод” үндэсний хөдөлгөөний хүрээнд Дорнод аймаг 2025 оны байдлаар нийт 2.9 сая мод тарьсан бөгөөд энэ нь аймгийн нэг иргэн дунджаар 35 мод тарьсан үзүүлэлттэй тэнцэж байна.
Энэ жилийн мод тарих ажлын нээлт өнөөдөр боллоо. Хаврын улиралд Хэрлэн сумын ногоон байгууламжийг нэмэгдүүлэх зорилгоор 2, 3, 4, 10 дугаар багийн хойд хэсэгт байрлах 10 га талбайд мод тарих ажлыг зохион байгуулахаар төлөвлөжээ.
Мөн мод тарих ажилд оролцох иргэн, аж ахуйн нэгжүүдэд зориулан Чойбалсан хотын Соёл, амралтын хүрээлэн ОНӨААТҮГ-тай хамтран 1300 мод тарих нүхийг урьдчилан ухаж бэлтгэсэн байна. Түүнчлэн тус талбайд тарих 900 улиас модыг худалдан авах ажлыг зохион байгуулж байгаа юм. Цаашид энэ онд улсын төсвийн хөрөнгөөр 250 га талбайд уулын ойжуулалт хийхээр төлөвлөж, орон нутгийн төсвийн дэмжлэгтэйгээр Баяндун, Баян-Уул, Халхгол суманд тус бүр 10 га талбайд хамгаалалтын ойн зурвас байгуулахаар ажиллаж байгааг БОГ-аас мэдээллээ.
Мод тарих өдрийн нээлтийн үеэр “Чандмань тал” ХХК-иас хандивласан нарсны суулгацыг БОЭТ-ийн 100 жилийн ойд зориулан 100 ширхэг, Чулуунхороот сумын 70 жилийн ойд зориулан 50 ширхэг, МУИС-ийн харьяа Дорнод аймаг дахь ЕБС-д 50 ширхэг, Хэрлэн сумын ногоон байгууламжид 200 ширхэг нарс, 900 улиас тус тус хуваарилан олгосон байна.
Эх сурвалж: Montsame.mn
