Шатрын Монгол Улсын аварга шалгаруулах эрэгтэйчүүдийн 64, эмэгтэйчүүдийн 56 дахь удаагийн тэмцээний хагас шигшээ шат Тусгаар тогтнолын ордонд болж, шигшээд өрсөлдөх шатарчид тодорлоо.

Энэ жилийн хагас шигшээ тэмцээн олон улсын болон дотоод рейтинг хоёуланг бодсоноороо онцлогтой. Эрэгтэй, эмэгтэй ангилалд өрсөлдсөн 148 шатарчнаас 49 нь олон улсын цолтой байжээ. Таван өдөр үргэлжилсэн хагас шигшээ шатнаас эрэгтэй, эмэгтэй тус бүр 11 тамирчин шигшээд шалгарсан бөгөөд аравдугаар сард их мастер С.Билгүүн, олон улсын мастер Б.Мөнгөнзул нартай аваргын төлөө өрсөлдөнө.

Эрэгтэйчүүдээс олон улсын мастер С.Ган-Эрдэнэ 7.5 оноогоор түрүүлсэн бол ФИДЕ мастер Э.Энхнар, Г.Тэнгүүдалай, Н.Содбилэгт, Э.Болдоо нар шалгарав. Араас нь залуу олон улсын мастерууд болох Х.Өлзийхишиг, Х.Итгэлт, С.Чингүүн, Г.Амартүвшин, Ү.Агьбилэг, Э.Баасансүрэн нар эхний 11-т жагссанаар шигшээд оролцох эрхтэй болжээ.

Эмэгтэйчүүдийн ангилалд кандитат мастер Х.Баясгалан 11 өргөөс есөн оноо авснаар түрүүлсэн бөгөөд тэрбээр 11 өрөг тоглохдоо долоо хожиж, дөрөв тэнцсэн байна. Харин их мастер Б.Мөнгөнтуул, ФИДЕ мастер Э.Хүслэн, их мастер Т.Мөнхзул, ФИДЕ мастер Б.Буянхишиг нар эхний тавд орлоо. Үүнээс гадна шигшээд өрсөлдөхөөр кандитат мастер Э.Зол-Учрал, Н.Содгэрэлт, ФИДЕ мастер Б.Хүслэнзаяа, Н.Энхболор, олон улсын мастер Б.Хулан, залуу мастер Б.Энхнамуун нар эрхээ авчээ.

Ташрамд дурдахад, Монголын шатарчид есдүгээр сард дэлхийн шатрын 46 дугаар олимпиадад оролцох учраас шигшээ тэмцээнийг аравдугаар сард зохион байгуулахаар төлөвлөжээ.

Эх сурвалж: Montsame.mn