Нийслэлийн Соёл, урлагийн газраас оюунлаг, соёлтой, ухамсарт иргэнийг төлөвшүүлэх, эерэг сэтгэлгээг хөгжүүлэх, иргэний соёлын боловсрол, ёс зүй, зан суртахууны зөв төлөвшлийг түгээн дэлгэрүүлэх, инновац, шинэчлэлийн үнэт зүйлсийг дэмжих, уран бүтээлчдийн туршлага солилцох боломжийг бүрдүүлэх, хувь хүний ухамсар, нийгмийн сайн сайханд үлгэр үзүүлэх зорилгоор “UB Drone Battle” уралдааныг зарлалаа.

Уралдаанд нийслэл Улаанбаатар хотоос болон хөдөө орон нутгаас бүх насныхан оролцох боломжтой. Бүтээлийг 2026 оны тавдугаар сарын 22-ны өдрөөс тавдугаар сарын 25-ны өдрийн хооронд хүлээн авах бөгөөд тавдугаар сарын 27-29-ний өдөр уралдааны шилдгүүдийг шалгаруулж, тавдугаар сарын 30-ны өдөр шагнал гардуулна.

НЭГ. ҮНДЭСЛЭЛ

“Алсын хараа-2050” Монгол улсын урт хугацааны хөгжлийн бодлогын 1.1 дэх зорилт, Монгол Улсын Засгийн газрын 2024-2028 үйл ажиллагааны хөтөлбөрийн 3.3.6.10 дахь зорилт, Нийслэлийн Засаг дарга бөгөөд Улаанбаатар хотын Захирагчийн 2024-2028 оны үйл ажиллагааны хөтөлбөрийн 2.4 дэх зорилт, Нийслэлийг 2026-2030 онд хэрэгжүүлэх таван жилийн үндсэн чиглэлийн 3.1.1.1 дэх зорилт, Монгол Улсын Ерөнхийлөгчийн Тамгын газрын даргын 2026 оны 26, 58 дугаар захирамж, Нийслэлийн Засаг даргын 2026 оны А/631 дугаар захирамжийг тус үндэслэв.

ХОЁР. ЗОРИЛГО

Монгол Улсын Ерөнхийлөгчийн ивээл дор зохион байгуулагдах “Нисгэгчгүй нисэх хэрэгсэл жолоодлогын олон улсын аварга шалгаруулах тэмцээн”-ийг угтан Монголын үзэсгэлэнт эх орноороо бахархах үзлийг түгээн дэлгэрүүлэх, нийслэлийн оюунлаг, соёлтой, ухамсарт иргэнийг төлөвшүүлэх, иргэдийн эерэг сэтгэлгээг дэмжих, инновац, шинэчлэлийн үнэт зүйлсийг сурталчлан хөгжүүлэхийн зэрэгцээ Улаанбаатар хотыг соёл иргэншил, өв уламжлал, ногоон хөгжил, орчин үеийн зохицлыг хослуулсан жишиг хот болгон хөгжүүлэх бодлогыг дэмжиж, уран бүтээлчид болон оролцогч талуудын туршлага солилцох, хамтын ажиллагааг өргөжүүлэх нөхцөлийг бүрдүүлэхэд оршино.

ГУРАВ. ЗОРИЛТ

• Дижитал шилжилт, инновацын бодлогыг эрчимжүүлэх,
• Монголын сайхан эх орон, үндэсний өв соёлоо дэлгэрүүлэх,
• Улаанбаатар хотын хөгжил, бүтээн байгуулалт, архитектур, байгаль орчны өөрчлөлтийг эерэг өнцгөөс олон нийтэд таниулах,
• Иргэний соёлын боловсрол, оюунлаг иргэншил, хамтаар орших ухамсрыг бүтээлч байдлаар илэрхийлэх,
• Хотын үнэт зүйлс болох оюунлаг соёл, ногоон хөгжил, өв уламжлал ба орчин үеийн зохицлыг бүтээлчээр харуулах,
• Дэвшилтэт технологи, дижитал урлагийн шинэлэг хэрэглээг хөгжүүлж, инновацын соёлыг төлөвшүүлэн Улаанбаатар хотын нэр хүндийг олон улсад сурталчлах.

ДӨРӨВ. ХАМРАХ ХҮРЭЭ

• Уралдаанд нийслэл Улаанбаатар хотоос болон хөдөө орон нутгаас бүх насны, мэргэжлийн болон мэргэжил харгалзахгүй иргэд оролцох боломжтой.

ТАВ. ОРОЛЦОХ БҮТЭЭЛИЙН СЭДЭВ

1. Оноосон сэдэв:

• Монгол үндэсний өв соёл, уламжлал
• Нийслэл Улаанбаатар хотын хөгжил
• Хотын соёл, нийгмийн эерэг хандлага
• Миний аз жаргалтай гэр бүл

2. Нээлттэй сэдэв:

• Чөлөөт сэдэв

Уралдаанд оролцогчид дээрх сэдвийн хүрээнд хоёр бүтээлээр оролцоно.

ЗУРГАА. ТАВИГДАХ ШААРДЛАГА

Видео контент:

• Хугацаа: 15 секундээс 2 минут хүртэл
• Улаанбаатар хотын орчин үеийн дүр төрх, түүх соёлын дурсгалт газрууд, иргэдийн амьдралын хэв маяг, соёлын боловсрол, байгаль орчин, хотын соёл, хамтаар амьдрах нийгмийн сайн сайханд үлгэр дуурайлал үзүүлэх үнэт зарчмыг түгээн дэлгэрүүлэх агуулгыг харуулсан байх
• Оюуны өмчийн зөрчилгүй байх бөгөөд оюуны өмчийн маргаан үүссэн тохиолдолд ирүүлсэн тал бүрэн хариуцлага хүлээнэ.
• Бүтээлийн агуулга, чанар, бүтээлч хандлага, шинэ шийдэл, уран сэтгэмжийг харж үнэлнэ.
• Дуу, дүрсний зохицол, эвлүүлэг, өнгө, өгүүлэмжийн чанар өндөр түвшинд байх

Техникийн шаардлага:

• Камер, гар утас, дрон, олон үйлдлийн камер зэрэг бүх төрлийн төхөөрөмж ашиглаж болно
• Видео: HD (1280x720) болон түүнээс дээш чанартай
• Бүтээл нь шинэлэг, эх загвар байх ёстой (хуулбар болон AI-гаар бүтээсэн байж болохгүй)

ДОЛОО. ШАЛГАРУУЛАЛТЫН ЖУРАМ

• Бүтээлийг wetransfer линкээр [email protected] цахим хаягаар хүлээж авна.
• Өөрийн овог, нэр, утасны дугаар болон бүтээлээ удирдамжид өгөгдсөн аль сэдвийн хүрээнд бүтээснээ тодорхой бичиж ирүүлнэ.
• Бүтээлүүдийг “UB Drone Battle” албан ёсны фэйсбүүк болон инстаграм хуудсанд нийтэлнэ
• Хуурамч, зохиомол хандалт илэрвэл оноо хасалт хийнэ
• Урьдчилсан шат – Олон нийтийн оролцоо Like, Share, Comment зэргийн тоо: 20 оноо
• Эцсийн шат – Шүүгчдийн үнэлгээ (80%)
• Агуулгын зохиомж: 20 оноо
• Бүтээлч санаачилга, шинэ шийдэл: 25 оноо
• Техникийн дуу, дүрсний гүйцэтгэл: 20 оноо
• Нийгмийн эерэг уриалга: 15 оноо
• Нийт үнэлгээ: 100 оноо
• Хэрэв оноо тэнцвэл ерөнхий шүүгчид зөвлөлдөж шийднэ.

НАЙМ. УРАЛДААНЫ ХУГАЦАА

• Уралдааны бүтээл хүлээн авах, бүтээлийг олон нийтэд түгээх: 2026 оны тавдугаар сарын 22-ны өдрөөс тавдугаар сарын 25-ны өдөр
• Уралдааны шалгаруулалт хийх: 2026 оны тавдугаар сарын 27-29-ний өдөр
• Шилдэг бүтээлийн шагнал гардуулах: 2026 оны тавдугаар сарын 30-ны өдөр

ЕС. ШАГНАЛ, УРАМШУУЛАЛ

• 1 дүгээр байр: DJI Mavic Pro 4 мэргэжлийн дрон
• 2 дугаар байр: 8.000.000 төгрөгийн мөнгөн шагнал
• 3 дугаар байр: 5.000.000 төгрөгийн мөнгөн шагнал
• Тусгай байр: 1.500.000 төгрөгийн мөнгөн шагнал

АРАВ. ҮР ДҮН

• Улаанбаатар хотын хөгжил, өнгө төрх, соёл, иргэдийн амьдралын хэв маягийг орчин үеийн дижитал хэлбэрээр олон нийтэд бүтээлч байдлаар хүргэнэ.
• Залуучууд, уран бүтээлчдийн дунд дижитал урлаг, инновац, шинэ технологийн хэрэглээ нэмэгдэж, бүтээлч сэтгэлгээ хөгжих нөхцөл бүрдэнэ.
• Иргэдийн хотын соёл, нийгмийн хариуцлага, эерэг хандлага, хамтаар орших ухамсрыг уран бүтээлээр дамжуулан түгээн дэлгэрүүлнэ.
• Монголын өв соёл, уламжлал, байгаль орчны үнэ цэнийг орчин үеийн контентоор дамжуулан сурталчлах боломж нэмэгдэнэ.
• Улаанбаатар хотын имидж, нэр хүндийг дотоод болон олон улсын түвшинд эергээр сурталчлах контентын сан бүрдэнэ.
• Дрон болон видео контент бүтээх чиглэлээр сонирхогч, мэргэжлийн уран бүтээлчдийн хамтын ажиллагаа, туршлага солилцоо сайжирна.

АРВАН НЭГ. ЗОХИОН БАЙГУУЛАГЧ

• Нийслэлийн Засаг даргын Тамгын газар
• Нийслэлийн Соёл, урлагийн газар

АРВАН ХОЁР. ХОЛБОО БАРИХ

Тэмцээнтэй холбоотой бүртгэл, зохион байгуулалт, мэдээллийн талаар дараах хаягаар холбогдоно уу. И-мэйл: [email protected]

Хариуцсан мэргэжилтэн: Урлаг, уран бүтээлийн асуудал хариуцсан ахлах мэргэжилтэн Б.Шашу, утасны дугаар: 95879597

Мөн тэмцээний талаарх дэлгэрэнгүй мэдээллийг Нийслэлийн Соёл, урлагийн газрын албан ёсны цахим хуудас, UB Drone battle цахим хуудсар авах боломжтой.

НИЙСЛЭЛИЙН СОЁЛ, УРЛАГИЙН ГАЗАР

Эх сурвалж: Ulaanbaatar.mn