Монгол Улсад хувийн хэргээр оршин сууж буй гадаад иргэдийн 52.4 хувь нь хөдөлмөр эрхлэх зорилгоор оршин сууж байгааг ГИХГ мэдээлэв.
Тодруулбал, 2189 аж ахуйн нэгж, байгууллагын урилгаар гадаадын 17944 иргэн хөдөлмөр эрхэлж байгаагийн 39.3 хувь хувь нь барилга, угсралт, зам, гүүр, бүтээн байгуулалтын салбарт, 25.4 хувь нь геологи, уул уурхай, газрын тос, эрчим хүчний салбарт, 17.1 хувь нь үйлдвэрлэл, үйлчилгээний салбарт ажиллаж байна.
Гадаадын иргэний эрх зүйн байдлын тухай хуулийн дагуу Монгол Улсын хүн амын гурван хувь буюу гадаадын 107 мянга орчим иргэн, үүний дотор нэг улсын 35 мянга хүртэл иргэн хувийн хэргээр оршин суух боломжтой. Энэ оны дөрөвдүгээр сарын 30-ны байдлаар 133 улсын 34241 иргэн албан болон хувийн хэргээр оршин сууж байв. Манай улсад хувийн хэргээр оршин сууж буй гадаадын иргэдийн тоо нь хүн амын 0.94 хувийг эзэлж байна.
Хөдөлмөр эрхлэх (С) ангиллын оршин суух зөвшөөрлийг Хөдөлмөр, халамжийн үйлчилгээний ерөнхий газар (ХХҮЕГ)-аас олгосон хөдөлмөр эрхлэх зөвшөөрөлд үндэслэн олгодог. Мөн гадаад ажилтан авч ажиллуулж буй аж ахуйн нэгж, байгууллага нь хуульд заасны дагуу хөдөлмөрийн хөлсний доод хэмжээг хоёр дахин нэмсэнтэй тэнцэх хэмжээний ажлын байрны төлбөрийг сар бүр төлдөг. Энэ төлбөр нь Хөдөлмөр эрхлэлтийг дэмжих санд төвлөрч дотоодын иргэдийн хөдөлмөр эрхлэлтийг дэмжих үйл ажиллагааг санхүүжүүлдэг бөгөөд 2024 онд 124.9 тэрбум, 2025 онд 189.8 тэрбум төгрөг төвлөрүүлжээ.
Эх сурвалж: Montsame.mn
