Намайг Цэгмид овогтой Оюундэлгэр гэдэг.
Эрүүл мэндийн шинжлэх ухааны их сургуулийн харьяа Сувилахуйн сургуульд эх баригч мэргэжил эзэмшсэн. Эх хүүхдийн эрүүл мэндийн үндэсний төв буюу хуучнаар Эх нялхсын төрөх тасагт 23 дахь жилдээ ажиллаж, 9000 эхийг амаржуулсан байна.
Анх ажилд орсны дараа шантрах үе их гарна аа. Ажлаасаа гармаар санагдах үе ч байсан. Анх шалгалт өгч ажилд орсон болохоор өөр газар дахиад л шалгалт өгнө гэж бодохоор нэгэнт энэ эмнэлгийн шалгалтыг даваад орсон юм чинь ажиллаж чадна шүү дээ гэсэн бодол төрөөд ажилдаа үлдэж байлаа. Гурван жил ажиллалаа. Ажилдаа гаршаад дадаад ирсэн. Одоо бол юун ажлаасаа гарах. Ажилдаа дасаад, дурлаад, дуртайяа ажиллах болсон.
Миний ажлын нэг өдөр ер нь л их завгүй өнгөрдөг. Ачаалал ихтэй зарим өдөр ус уух ч зав олддоггүй. Манайх нэг ээлжиндээ 4 эх баригч гардаг. Эмч, эх баригч, асрагч, нярайн эмч, сувилагч гээд бүгд нэг баг болж зүтгдэг. 2007 онд төрөлт маш их байв. Зөвхөн манай эмнэлэгт гэхэд 12 мянган эх төрж байлаа. Тэр нь өнөө алтан гахай жил шүү дээ.
Тэр үеийг бодвол төрөлт харьцангуй цөөрч, жилд 8000-9000 эх төрж байна. Ихэр төрөлтийн хувьд 2025 онд хоёр ихэр 6 жирэмсэн эхийг амаржуулсан. Ихрүүдтэй үед санаа их зовно. Хүндрэл гарах вий гэж түгшинэ. Эх үрсийг аль болох эсэн мэнд уулзуулчих юм сан л гэж бодно. Саяхан л өвдөлтөөсөө болоод уйлж, тамирдаж байсан эх төрчихөөд инээж байхыг харах хэчнээн сайхан.
Төрж байгаа эхэд бие махбодын төдийгүй сэтгэл зүйн асар их дэмжлэг хэрэгтэй болдог. Иймд эх баригч зөвхөн эмнэлгийн тусламж үзүүлэхээс гадна тэдний айдас, эргэлзээг ойлгож, урам зориг өгч, итгэл төрүүлэхийг хичээдэг. Бидний ажил бол зөвхөн мэргэжил биш, итгэл, хариуцлага, сэтгэлийн дуудлага юм. Хүний амьдралын хамгийн нандин мөчүүдийн нэг бол яалтгүй л шинэ амь, шинэ хүн мэндлэх тэр торгон агшин юм. Энэ л гэгээн агшинд эх баригч бид эх, үрсийн дэргэд хамтдаа байж байдаг нь үнэхээр гайхалтай.
Эцэст нь хэлэхэд, эх баригчийн ажлын зорилго бол эрүүл эх, эрүүл хүүхэд төдийгүй аз жаргалтай гэр бүлийг бүтээхэд өөрсдийн хувь нэмрийг оруулах юм.
Гэрэл зургийг Г.Мөнх-Од
Эх сурвалж: Montsame.mn
