Аймгийн ЗДТГ, Боловсролын газар, Хэлний бодлогын Архангай аймгийн салбар зөвлөл хамтран “Эх хэлний эзэд” монгол хэл, бичгийн аймгийн анхдугаар олимпиадыг 5 дугаар сарын 3-ны өдөр Эрдэнэбулган сумын 2 дугаар сургууль дээр зохион байгууллаа.
Олимпиадад 27 сургуулийн 3-12 дугаар ангийн мянга гаруй сурагч мэдлэг чадвараа сорьж, оролцсон юм.
Олимиад нь ерөнхий боловсролын сургуулийн багш, сурагчдын идэвх оролцоог дээшлүүлэх, монгол хэл, үндэсний бичгийн сургалтын чанарт ахиц гаргах, монгол хэл, бичиг үсгийг эзэмших, хэрэглэх, хамгаалах, өвлүүлэх зорилготой.
3-12 дугаарын ангийн сурагчид тус олимпиадаас 32 алт, 64 мөнгө, 118 хүрэл медалийг хүртжээ.
Шилдэг багшаар Ихтамир сумын багш Л.Даваахүү, Чулуут сумын багш С.Эрдэнэчимэг, Батцэнгэл сумын багш Ц.Дашдулам, бага ангийн багш нарын ангилалд А.Лхагвадулам, Б.Хажидсүрэн, Н.Зулцэцэг нар шалгарчээ.
“Эх хэлний эзэд” олимпиадын нээлтийн үеэр БШУЯ-ны “Үндэсний бичиг үсэг түгээн дэлгэрүүлэгч” цол, тэмдгээр Эрдэнэбулган сумын 1 дүгээр сургуулийн багш Б.Наранчимэг, Чулуут сумын багш С.Эрдэнэчимэг, Ихтамир сумын багш Л.Өнөржаргал, Батцэнгэл сумын багш Ц.Дашдулам нарыг шагналаа.
Архангай аймаг 2026 оныг боловсролыг дэмжих жил болгон багш нарын мэдлэг боловсрол, арга зүй, ур чадварыг сайжруулах, хүүхдийг бүх талаар нь хөгжүүлэх, эцэг эх, асран хамгаалагчдын оролцоог нэмэгдүүлэх ажлуудыг хийхээр төлөвлөсөн нь энэхүү олимиадыг зохион байгуулах үндэслэл болжээ.
Эх сурвалж: Montsame.mn
