Болгарын Цэргийн түүхийн үндэсний музей байгуулагдсаны 110 жилийн ойд зориулсан “Дайны үед бүтээж, урлагаар хадгалав” сэдэвт үзэсгэлэнг мягмар гарагт нээжээ.
Болгарын Батлан хамгаалахын дэд сайд Йордан Божилов үзэсгэлэнг нээж үг хэлэхдээ, тус музей бол “сонголт, эрсдэл, үр дагавар”-аар хэлбэржин бий болдог түүхийг хадгалагч юм хэмээн мэдэгдээд, Болгар улс НАТО болон Европын Холбооны гишүүн болж хөгжсөнийг онцолсон байна.
Мөн дэд Ерөнхийлөгч Илиана Йотова мэндчилгээ ирүүлсэн бөгөөд тавдугаар сарын 6-ны өдөр тохиох “Эрэлхэг зоригийн өдөр” буюу Зэвсэгт хүчний өдрийг угтан зохион байгуулж буй уг үзэсгэлэн нь Болгарын дайчдад үзүүлж буй хүндэтгэл болохыг тэмдэглэжээ.
Музейн захирал Соня Пенкова энэхүү үзэсгэлэнд дайн тулааныг урлагийн өнцгөөс харуулж, байлдааны талбар дахь амьдралыг баримтжуулан үлдээсэн цэргийн зураачдын бүтээлүүдийг дэлгэснийг онцолсон байна.
Үзэсгэлэнд дэлгэсэн бүтээлүүдэд Дэлхийн I дайны үе буюу 1916 оноос эхлэлтэй үйл явцыг өгүүлэх бөгөөд тэр үед музейн суурь тавигдаж, Болгарын уран бүтээлчид дайны үеийн бүтээлүүдээ олон улсад анх дэлгэж эхэлсэн түүхтэй.
Ярослав Вешин, Борис Денев, Димитар Гюженов, Владимир Димитров зэрэг Болгарын нэрт зураачдын дайн ба урлагийн огтлолцлыг харуулсан сор бүтээлүүдийг үзэсгэлэнд дэлгэжээ.
Эх сурвалж: Montsame.mn
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!